Magpahimos sa implementasyon 

sa TRAIN law, tutokan sa DTI

MANILA, January 8 (PIA)--Giseguro sa Malakanyang nga tutokan sa Department of Trade and Industry (DTI) ang mga posibleng magpahimos nga mga negosyante sa implementasyon sa Tax Reform for Acceleration and Inclusion (TRAIN) law.

Gibutyag ni Presidential Communications Operations Office (PCOO) Kalihim Martin Andanar nga kinahanglang madakpan sa DTI ang mga negosyong magpahimos sa pagsaka dayon sa presyo sa ilang produkto bisan nga may mga daang stocks pa sila sa wala pa ang implementasyon sa TRAIN law niadtong Enero 1.

Gipasabot pa sa kalihim nga mapahimoslan gayud sa katawhan ang TRAIN law tungod kay dinhi man maggikan ang pondo sa mga programa sa gobyerno alang sa katawhan ilabi na ang mga kabos sama nalang sa mga serbisyo sa panglawas, conditional cash transfer nga may dugang bugas, pagpanghatag og yuta sa mga mag-uuma ug bisan ang libreng tuition fee sa mga kabos nga estudyante.

Samtang gipahinumdom usab ni Andanar sa mga negosyante nga kinahanglang hulaton una nila ang ipagawas nga Implementing Rules and Regulations (IRR) sa dili pa sila magpahamtang og adjustment sa presyo sa ilang mga produkto. (ecb/PIA7-Bohol)

===============

Technical working group, gimugna aron mag-monitor

sa mga presyo sa mga panaliton sa Bohol

TAGBILARAN CITY, January 8 (PIA)--Ang Sangguniang Panlalawigan (SP) nagmugna og technical working group nga maoy mag-monitor sa lihok sa presyo sa mga isda ug mga produktong petrolyum, ilabi na sa implementasyon sa bag-ong tax reform law nga gitawag og Tax Reform for Acceleration and Inclusion (TRAIN) law nga bag-o lang gilagdaan ni Presidente Rodrigo Duterte.

Si Gob. Edgar Chatto nibutyag niini niadtong Biyernes sa iang sinemanang programa nga ‘Kita ug Ang Gobernador’.

Gipasabot ni Chatto nga ang maong TWG parte sa price monitoring council sa Department of Trade and Industry (DTI).

Gipahibalo usab sa gobernador nga ipatawag niya ang price monitoring council sa usa ka meeting karong semanaha diin mga representante gikan sa DTI, Department of Agriculture (DA), Department of Health (DOH) ug Department of Environment and Natural Resources (DENR) ang gidapit.

Agi kini og tubag sa mga taho nga pipila ka establisemento ning syudad sa Tagbilaran ang nipasaka na sa ilang mga presyo sa sigarilyo, soft drinks, produktong petrolyum, LPG ug uban pang produkto. (ecb/PIA7-Bohol)