Thursday, January 04, 2018

PCG: dakpon ang bangka
nga walay rehistro, SSEN 

TAGBILARAN CITY, January 3, (PIA)--Sa di madugay, dili na makadali-dali og byahe ang mga sakayang pangdagat kon wala kini makarehistro sa lokal nga mga otoridad. 

Sa nag-ungot ng aghat sa mga tinugyanan nga iparehistro na ang tanang mga sakyanan sa dagat ilabi na gayud kadtong nag-padumala og nga binayran nga byahe, midason ang Philippine Coast Guard (PCG) nga subay sa Memorandum Circular 2017-001, mapugos na sila sa pagdakop niadtong mga sakayan o bangka nga walay nakatatak nga Safety, Security, ug Environmental Numbering (SSEN) System. 

Niini, mas sayun na unya ang pagtumbok kon diin nga lalawigan ang sakayan, rehistrado ba kini og wala ba kini gamita sa ilegal nga pamaagi, dugang sa PCG. 

Gipasabut ni Coast Guard Commander Captain Edgar Boado nga kini nga memorandum nagsandig sa RA 9993 ug sa iyang Implementing Rules and Regulations (IRR), Office of the president Memo No 4, September 2016, as Articles 21 ug 24 sa United nations Convention on Laws of the Sea (UNCLOS) ilabi na sa Suppression of Unlawful Acts Convention. 

Subay niini, ang tanang watercrafts nga maglawig sa kadagatan sa Pilipinas, dili magbali sa kadak-on, sa mekanismo nga nagpadagan niini, kinahanglang rehistrado na ilawom sa SSEN system sa labing duol nga PCG unit diin sila magdunggo-an. 

Manghatag ang PCG sa numero alang sa unique nga SSEN sa usa ka sakyanan, lakip na ang plate number, og kon ugaling rehistrado na sa MARINA o sa International Maritime Organization (IMO), kini nga numero usab ang ipalama sa SSEN niini. 

Ang SSEN number ipaluma sa duha ka palid sa dung sa bangka o sa bisan haing dahin nga mas makita sa kadaghanan segun usab sa sugyot sa PCG Commander.

Sa mga dagkong bangka, ang SSEN ibutang sa duha ka palid sa dung samtang ang plate number ibutang sa sulod sa timonel. 

Ang tanang bangka nga may SSEN, kinahanglang magbitbit sa ilang mga papeles samtang nagbyahe tungod kay bisan haing dapit, mahimong magsusi ang PCG, dugang ni Capt. Boado. 

Kadtong masakpang walay SSEN, dakpon ug dili buhi-an ang bangka handtud nga marehistro kini sa LGU o sa MARINA segun sa gidak-on sa bangka ug sa gamit niini. 

Libre, matud pa ni Capt Boado ang pagpapatik sa SSEN sa mga bangka nga rehistrado na. 

Alang sa pagparehistro, bisitaha ang labing duol nga PCG Station aron katabangan nga maluwas ang sakayan ug tag-iya sa dakop. (rahc/PIA-7/Bohol)
Depensa batok sa ilegalista ug terorismo ang SSEN, dason ni PCG Captain Edgar Boado didto sa Kapihan sa PIA, dihang gipangutana sa mga sakop sa media kabahin sa bag-ong memorandum sa pagrehsitro sa mga bangka. (rahc/PIA-7/Bohol) 



No comments: