Monday, January 29, 2018

Phivolcs, nipasidaan sa publiko kalabot 
sa mikatap nga mga balita sa social media


MANILA, Enero 29 (PIA)--Nipasidaan ang Philippine Institute of Volcanology and Seismology (Phivolcs) kalabot sa mga nikatap nga balita sa social media kalabot sa pagkaapil sa Pilipinas sa Pacific Ring Fire.

Sa usa ka interview, gipasabot ni Phivolcs Director Renato Solidum nga ang Pacific Ring of Fire usa ka geographic feature diin ang mga nasod sa palibot sa Pacific Ocean adunay mga aktibong bulkan ug posibleng kanunay makasinati og paglinog ug panagsa usab, tsunami.

Matud pa nga normal ang mga ingon niining aktibidad ug walay kalabotan sa ubang lagyong mga nasod.

Gidugang pa ni Solidum nga walay kalabotan ang mga earthquake warnings sa ubang nasod tungod kay giingong may mga nagkada-iyang earthquake generator man ang mga nasod.

Giingong lisod ug dili kontrolado ang social media mao nga nagkalain-lain ang mga maka-abot nga balita sa publiko.

Apan gipasabot ni Solidum nga walay problema ang mohatag og opinyon o panglantaw sa mga paglinog ug pag-alburoto sa Bulkang Mayon apan giigong angay usab maggahin og panahon alang sa hingpit nga pag-amping kauban ang pamilya. (ecb/PIA7-Bohol)

==============
Early registration sa 
DepEd, gisugdan na


TAGBILARAN CITY, Enero 29 (PIA)--Gi-awhag sa Department of Education (DepEd) ang mga estudyante nga sayong magpalista alang sa sunod tuig nga school year 2018-2019.

Ubos sa DepEd Order No. 25 o School Calendar for School Year 2017-2018, gitakda ang sayong pagpa-rehistro.

Gisudgan sa buhatan niadtong Sabado, Enero 27, ang ‘early registration’ alang sa mga tinun-an gikan kindergarten hangtod high school sa tanang mga pampublikong mga tunghaan sa tibuok nasod.

Molanat ang early registration og usa ka buwan o hangtod Pebrero 28, 2018. 

Matud pa sa DepEd nga ang mga tinun-an nga mosulod sa kindergarten angay nga ang edad naa sa lima ka tuig lamang. 

Apan kung ang bata mag-lima ka tuig karong Agosto 31 pa ning tuig, mahimo pa gihapon kining dawaton apan adunay mga assessment nga himuon ang buhatan. (ecb/PIA7-Bohol)

==============
Bol-anon, apil sa gitudlo ni Duterte isip miyembro sa 
consultative body nga mo-review sa 1987 constitution 

TAGBILARAN CITY, Enero 29 (PIA)--Gitudlo ni Presidente Rodrigo Duterte ang usa ka Bol-anon nga kanhi professor niya sa San Beda College sa Manila isip usa sa 19 ka miyembro sa committee nga mo-review sa 1987 Constitution.

Si kanhi OIC Gob. Victor de la Serna, usa ka bar topnotcher ang usa sa gitudlo nga mo-review sa konstitusyon isip parte sa prosesong legal sa paghimo sa Charter Change (Cha-cha). Napili usab siya isip miyembro sa 1972 Constitutional Convention.

Si kanhi Supreme Court Chief Justice Reynato Puno ang natudlong manguna sa maong committee nga mao usab ang nagpasiugda sa pederalismo.

Natudlo usab nga miyembro si kanhi Senador Aquilino Pimentel, Jr., nga inilang bantogan sa local government code.

Ang ubang natudlo nga miyembro mao ang mosunod: kanhi SC Associate Justice Bienvenido Reyes; Founder sa Radio Mindanao Network nga si Atty. Reuben Canoy, kanhi Justice ug Solicitor General Antonio Nachura Jr,; Julio Cabral Teehankee, kanhi Dean sa De La Salle University College of Liberal Art ug Father Ranhilio Aquino, Dean sa San Beda Graduate School of Law; Kalinga Rep. Laurence Wacnang; kanhi president sa Integrated Bar of the Philippines Roan Libarios ug Executive Director sa Local Government Development Foundation Edmund Soriano Tayao.

Sa napiling 19 ka miyembro, tulo ang Muslims nga mao silang kanhi Mindanao State University Tawi-Tawi chancellor Eddie Mapag Alih, kanhi Congressman sa Lanao del Sur Ali Pangalian Balindong ug Randolph Climaco Parcasio, abogado ug tigpamaba sa Moro National Liberation Front founder Nur Misuari.

Sa mga miyembro, tulo usab ang supporters sa PDP-Laban Federalism Institute nga mao sila Pimentel, Tayao ug Teehankee.

Gilagdaan ni Presidente Duterte niadtong Disyembre sa niaging tuig ang Executive Order 10 nga nagmugna sa 25-member committee nga mohimo og pag-review sa 1987 Constitution.

Ang maong committee gitahasan sa pagduso og report ug recommendation ngadto sa Presidente. (ecb/PIA7-Bohol)

No comments: