Pinol mitanyag pasiunang P30M

gasa sa ‘dairy industry’ sa Bohol 

TAGBILARAN CITY, January 30 (PIA)---Tungod sa positibong pagsanong sa mga tig-alima sa mga kabaw ug baka nga maoy tinubdan sa gatas sa Bohol, gipadayag ni Department of Agriculture (DA) Secretary Emmanuel Pinol ang pasiunang P30 milyones nga abag alang sa industriya nga panggatasan sa Bohol. 

Didto sa Tapatan: Goberno ug Katawhan, nga gitambongan mismo sa kalihim, uban sa mga tinugyanan sa National Dairy Authority uban ni Administrator Marilyn Mabale ug Regional Director Monina Mangubat ug ni Gobernador Edgar Chatto, gisuna ni Pinol ang mga Bol-anon nga dairy stakeholders kon uyon ba sila sa laraw nga himoon ang Bohol nga capital sa panggatasan sa nasud. 

Ambisyosong tumong sa DA nga patas-on ang produksyon sa gatas aron hulipan niini ang panginahanglan sa Pilipinas nga gitubag pinaagi sa pag-import sa gatas gikan sa gawas.

Matud ni Pinol, 1.8 % lamang ang local nga produksyon sa gatas ang nagsupply samtang kapin sa 98% ang gatas nga gipamalit sa Pilipinas sa gawas aron lamang matubag ang panginahanglan sa katawhan. 

Gipasabut ni Pinol nga dako ang pundo sa nasud nga saying lamang nga ipalit sa imported nga gatas kon mahimo sa nasud nga pakad-on niini ang produksyon. 

Gawas sa gatas, nasayran usab sa DA pinaagi sa us aka pagsusi human misaka si Pinol sa posisyon isip kalihim sa agrikultura. 

Matud niya, segun sa pagtuon, subay usab sa mandu ni Presidente Duterte nga sayran kon unsay mga pagkaon nga gipangpalit sa nasud sa gawas ug nagsayang lamang sa pundo sa nasud, migawas nga bisan ang monggos, kape, cacao ug gatas, gipalit sa nasud.

Kaya, segun pa sa DA ang pagproduce sa ning mga produkto, mahimo ra sa nasud apan wala gayud himo-a, o kon gihimo man, wala makalahutay sa nag-unang mga administrasyon. 

Bugtong paagi sa pagpadaghan sa gatas sa nasud, matud sa kalihim, mao usab ang pagpadaghan sa mga gatasan, butang nga gihimo na sa kagamhanan. 

Mokabat sa 5,000 ka baka nga gatasan nga gikan sa Brazil ang dalhon sa DA dinhi sa Bohol. 

Ang mga baka nga Girolando, maoy naghupot sa record sa labing daghang gatas nga makuha sa matag adlaw. 

Kini nga matang sa baka, makahatag sa 109 ka litro sa matag adlaw, kon ugaling alimahan kinig maayo ug pakan-on sa sakto.

Dugang ni Pinol, bisan lamang kon makakuha og 20 litros sa usa ka gatasan, daku na og ikatabang sa pagkab-ot sa nasud sa damgo nga mamahimong dairy capital. 

Apan, miinsistir si Pinol nga dili kini makab-ot kon ang mga Bol-anon dili mo-uyon sa sugyot sa DA. 

Sa pagsugot lamang sa mga Bol-anon, gihatag na ni Pinol ang pundo alang sa pagpatuman sa damgo dinhi sa Bohol. (rahc/PIA-7/Bohol)

Gitanyag ni DA Sec Manny Pinol ang P30 milyones nga abag sa industriya sa Bohol, sapunto lamang nga misugot ang mga Bol-anon nga himoon ang Bohol nga dairy capital sa Pilipinas. 5,000 ka bakang gatasan ang dalhon dinhi sa Bohol ug paalimahan ang mga nati sa mga Bol-anon, aron ma-arang-arang ang ilang kahimtang. (rahc/PIA-7/Bohol)