Pribadong sektor, dili goberno

importer sa baka'ng girolando

TAGBILARAN CITY. January 29 (PIA)--Pribadong sektor ug diki goberno ang magdala sa imported nga mga baka nga pasanayon ug gatasan alang sa dakung laraw nga himoon ang Bohol nga dairy capital sa nasud.

Kini maoy gipasabut ni Regional Technical Director for Research and Regulations sa Department of Agriculture Joel Elumba, samtang gikahinabi ang mga katawhan nga mosagup sa lapad ng laraw sa pagpadaghan sa produksyon sa gatas sa Bohol.

Daghan na ang katawhan nga nahingawa sa mahimong gasto sa kagamhanan sa pag import sa gikaraw nga 5000 ka baka gikan sa Brazil.

Gidugang ni Elumba atul sa pagbisita ni DA Secretary Manny Piñol sa Bohol, nga ipataas gikan sa 1.8 % nga kasamtangang lokal nga supply sa gatas ngadto na sa 10% pataas sa sunod nga mga tuig.

Ang Pilipinas padayon pa gihapon nga nagsalig sa imported nga gatas, butang nga natumbok na sa DA nga mahimong supplyan sa katawhan.

Lakip na sa laraw sa pagpadaghan sa gatas mao ang pagpadaghan usab sa populasyon sa mga gatasan nga sagopon sa mga komunidad arin mao nay magguyod sa mas dako ng kita sa mga mag-uuma.

Gitumbok sa DA ubos ni Kalihim Piñol ang pagpadala sa mga baka nga Girolando nganhi sa nasud ug dinhi sa Bohol.

Segun pa ni Kalihim Piñol, ang girolando usa ka matang sa baka nga haum sa tropical climate nga gikan sa Brazil kansang klima halos parehas ra sa Pilipinas.

Dugang ni Piñol, kinsa usa usab ka mag-uuma, nga kasamtangan nga naabut na sa girolando ang 34 ka litros nga gatas sa baka human kini gatasi.

Kasamtangan nga makuha sa usa ka Bol-anon nga mag-uuma ang 4-7.ka litro nga gatas sa matag hayop matag adlaw, gamit ng native o imported nga baka.

Pangandoy ni Piñol nga bisan kon maabut ang 20 litros lamang nga gatas ang produksyon sa girolando kon dalhon na dinhi, dako na kini og aswat sa kahimtang sa mga mag uuma.

Gawas sa gatas nga makuha, ang nati sa baka gilaraw nga ipang apud apod sa dinaghan sa mga kooperatiba aron himoon na usab ang Bohol nga nag unang prodyuser sa nati nga girolando, dugang pa ni Piñol. (rahc/pia-7/Bohol)

Gipasabut ni DA RTD for Research Joel Elumba nga ang mga baka nga girolando nga dalhon sa Bohol, ipasulod dinhi sa pribadong sektor, ug duyogan kini sa teknolohiya sa kagamhanan. (rahc/PIA-7/Bohol)