Sumbanan sa foreign trips sa mga opisyal 

sa gobyerno, gipagawas sa Malakanyang

MANILA, January 4 (PIA)--Gipagawas sa Malakanyang ang sumbanan alang sa mga pag-biyahe sa mga opisyal ug kawani sa gobyerno gawas sa nasod.

Base sa memorandum ni Executive Secretary Salvador Medialdea, tugotan lamang ang official foreign travel kun parte kini sa mandato sa opisyal, dili mahal ang gastuhon niini ug kun makapahimos ang nasod niini.

Gikinahanglan usab sa mga opisyal nga mokuha og travel authorization gikan sa iyang ahensiya, apil ang iyang mga personal nga pag-biyahe bisan nga walay gastuhon ang gobyerno niini.

Gimanduan usab ang mga otorisadong pangulo sa ahensiya sa pagduso og listahan sa mga gi-aprubahang biyahe sa Office of the Executive Secretary ug Department of Interior and Local Government.

Ang mapakyas sa pagsunod niini, mag-atubang og kasong administratibo nga misconduct, insubordination ug uban pang may kalabotan sa paglapas ubos sa Civil Service Commission (CSC) Revised Rules on Administrative Cases in the Civil Service.

Gihimo kining lakang sa Malakanyang human sa gihimong pagpalagpot sa katungdanan ni Presidente Rodrigo Duterte sa pipila ka mga opisyal sa gobyerno tungod sa kanunay nga pag-biyahe sa gawas sa nasod. (ecb/PIA7-Bohol) 

===============

Mga positibong epekto sa TRAIN, malabwan pa 

ang dungan niining pagsaka sa mga presyo sa panaliton

MANILA, January 4 (PIA)--Giingong malabwan sa mga positibong epekto sa Tax Reform for Acceleration and Inclusion (TRAIN) law ang dala niining pagsaka sa mga presyo sa panaliton.

Sa usa ka radio interview, gipasabot ni Presidential Communications Operations Office (PCOO) Kalihim Martin Andanar nga ang makolektang buhis sa gobyerno sa TRAIN gamiton sa pagpondo sa mga proyekto ubos sa infrastructure program nga “Build, Build, Build” nga gipaabot nga magsugod sa “golden age of infrastructure” sa nasod.

“Eh mas lumalaki po iyong pakinabang, mas malaki po—it outweighs—the positive… the pros outweigh vis-à-vis the TRAIN Law pagka’t ‘pag mayroon pong malilikom na mas malaking buwis ang ating gobyerno, ito po ay mapupunta rin sa iba’t ibang investments ng ating gobyerno at iba’t ibang mga proyekto,” matud pa ni Andanar.

Gidugang usab sa Kalihim nga ang TRAIN makatabang usab sa pagmugna og mga dugang trabaho.

Gawas niini, gipasabot usab sa Kalihim nga nalakip usab sa TRAIN ang mga pagkaltas sa kantidad sa buhis, sama na lamang sa mga tambal.

Niadtong Disyembre, gilagdaan ni Presidente Rodrgio Duterte ang TRAIN nga nagtinguhang itarong ang mga angay tarungon sa balaod sa buhisan sa nasod. (ecb/PIA7-Bohol)