Tanang local price council sa Bohol, 

gimanduan ni Gob. Chatto sa paglihok

TAGBILARAN CITY, Enero 15 (PIA)--Gimanduan ni Gob. Edgar Chatto ang tanang mga mayor sa Bohol sa paglihok sa ilang Price Monitoring Councils (PMCs) isip pagpangandam sa impak sa implementasyon sa bag-ong tax reform law sa nasod.

Tuyo usab niining pugngan ang mga negosyanteng magpahimos sa sitwasyon nga moresulta sa pagsaka sa mga presyo sa mga panaliton.

Niadtong Biyernes sa iyang sinemanang press forum nga “Kita ug Ang Gobernador,” si Chatto miingon nga ang nasinating dautang panahon ug implementasyon sa gobyerno sa Tax Reform for Acceleration and Inclusion (TRAIN) Law gigamit nga katarongan sa pagsaka sa mga presyo sa panaliton.

Tungod niini, gimanduan sa gobernador ang tanang government monitoring agencies ug LGUs sa pagproteher sa mga konsumidor pinaagi sa pagseguro sa implementasyon sa balaod sa price tag law sa tanang panaliton.

Gimando usab ni Chatto sa mga local price bodies sa pagpalig-on sa patakaran sa presyo bisan sa mga landing areas pa lamang sa mga produkto, ilabi na sa mga isda, sa dili pa kini moabot sa mga kamerkadohan.

Ang police power sa mga LGUs krusyal man sa pag-abag sa mga ahensiya sa gobyerno sama sa Department of Trade and Industry (DTI), Department of Agriculture (DA), Department of Health (DOH), Department of Environment and Natural Resources (DENR), Bureau of Fisheries and Aquatic Resources (BFAR), Philippine Coconut Authority (PCA), National Food Authority (NFA), ug Office of the Provincial Agriculture. 

Ang mga ahensiya sa gobyerno gitahasan man sa balaod sa pag-monitor sa mga presyo pinaagi sa pag-koordinar sa local price monitoring councils.

Tungod niini, gimanduan ni Chatto ang mga LGUs sa paglihok sa ilang local price monitoring councils sa pakig-koordinar sa nasudnon ug probinsiyal nga ahensiya sa gobyerno.

Gawas niini, gihangyo usab sa gobernador ang publiko sa pagbantay ug motabang sa pag-monitor sa kalit nga pagsaka sa mga presyo ug dili pagsunod sa mga negosyante sa suggested retail price (SRP). (ecb/PIA7-Bohol)

=================

Labing kabos nga pamilya, 

hatagan og P200 matag buwan

MANILA, Enero 15 (PIA)--Hatagan sa gobyerno og P200 nga subsidiya matag buwan ang labing kabos nga pamilya.

Kini aron matabangan sila nga makasugakod sa mahimong epekto sa Tax Reform for Acceleration and Inclusion (TRAIN) law sa administrasyon.

Matud pa ni Department of Budget and Management (DBM) Kalihim Benjamin Diokno, ang P200 nga subsidiya matag buwan tubag sa mga kritiko nga nag-ingong “anti-poor” ang bag-ong balaod.

Giingong makatabang sa 50 porsiyento nga pinaka-kabos nga pamilyang Pilipino kining aksiyon sa gobyerno nga gipaabot nga maapektohan sa bag-ong tax package.

Gitumbok usab ni Diokno nga ang malungtarong epekto sa TRAIN law mao ang mapakunhod ang mga presyo nga mahimong makaingon sa mas maayong produksiyon, piskay nga mga imprastraktura ug ubos nga presyo sa transportasyon.

Naggahin ang gobyerno og P24.5-bilyong unconditional cash grants pinaagi sa Department of Social Welfare and Development (DSWD) diin gipaabot ang P200 – P300 nga pagsaka sa subsidiya sa tuig 2019 ug 2022. (ecb/PIA7-Bohol)