Tuesday, February 20, 2018

18th Ubi Festival, gibuksan

TAGBILARAN CITY, Pebrero 20 (PIA)--Gibuksan na ang tulo ka adlaw nga 18th Ubi Festival nga nagdala sa tema nga: “Ubi, Hamiling Lagutmon Ikapasigarbo sa mga Turista sa Tanang Panahon.”

Gipangunahan nila Office of the Provincial Agriculturist OIC Larry Pamugas, SP Chair on Agriculture Abeleon Damalerio, Balilihan Mayor Pureza Chatto, Acting Vice Gob. Venzencio Arcamo ug Gob. Edgar Chatto ang ribbon cutting ug ang pagbukas sa exhibits nga gipahigayon ganinang udto sa Plaza Rizal, ning dakbayan sa Tagbilaran.

Gisundan kini og motorcade gikan Plaza Rizal paingon sa Island City Mall (ICM). 

Gipahigayon ang opening program sa ICM nga gitambongan ug gisalmotan sa mga lokal nga ubi growers, non-government organizations ug mga representante gikan sa academe.

Gisalmotan sa mga delegado gikan sa 24 ka lokalidad nga may potensiyal sa pagpananom og ubi ang festival ning tuig.

Kini naglakip sa mga lungsod sa Albur, Alicia, Antequera, Baclayon, Balilihan, Calape, Carmen, Corella, Cortes, Dauis, Dimiao, Duero, Jagna, Lila, Mabini, Maribojoc, Panglao, San Isidro, Sevilla, Sikatuna, Talibon, Ubay, ug syudad sa Tagbilaran.

Ang indigay sa ubi sama sa Binignit Eating Contest ug Ubi Challenge Eating Contest gipahigayon sa ICM samtang ang Best Ubi Booth/Ubi Exhibit Contest ug Indigenous/Endemic Crops Production Technology Contest gipahigayon sa Plaza Rizal.

Sa Pebrero 21, magpadayon ang pagpamaligya sa mga produkto sa ubi ug pagpili sa best booth/Ubi exhibit sa Plaza Rizal, samtang ang Literary Musical Contest nga naglakip sa Ubi Balak, Ubi Kuradang, Ubi Rap/Jingle, Bugno sa Rondalya ug Farmer Yoyoy Villame Voice a Like Contest ipahigayon sa ICM.

Ang closing ug awarding program alang sa mga mananaug sa Ubi Festival 2018 ipahigayon sa Pebrero 22 sa Plaza Rizal. 

Ang Ubifest, usa ka tinuig nga kapistahan agig pagsaulog sa lagutmon aron pagsugat sa tinuig usab nga ubi harvest. (ecb/PIA7-Bohol)
Gibuksan na ang tulo ka adlaw nga 18th Ubi Festival nga nagdala sa tema nga: “Ubi, Hamiling Lagutmon Ikapasigarbo sa mga Turista sa Tanang Panahon.” (ecb/PIA7-Bohol)

No comments: