Thursday, February 08, 2018

Antequera duathlon 2018 
nanawat nag registration 

TAGBILARAN CITY, February 7 (PIA)--Pagtak-op sa mga lumba sa Alicia, buksan na usab ang pagpangandam alang sa laing paduwa sa paugnat sa kusog nga nagduso sa Bohol palawom sa damgong angkonon na ang dungog nga labing bag-ong sentro sa sports tourism sa Kabisay-an. 

Gani dugay rang nanawat sa pagparehistro ug taman lamang sa katapusang adlaw sa Pebrero ang Antequera Duathlon 2018, matud ni Bise Mayor Simon Leo Jadulco, tigpasiugda sa lumba. 

Ang dualthlong usa ka lumba sa dagan sa unang lima ka kilometro, 20 ka kilometrong bisekleta ug laing 3 ka kilometrong dagan nga kinahanglang humanon sa unom ka oras, dugang niya. 

Bukas alang sa categoryang babaye, lalaki ug relay, may division alang sa 29 anyos paubos, 30-39, 40-49 ug 50 pataas alang sa lalaki ug 39 pa ubos sa babaye ug 40 pataas, ang registration nga mahimo adto himoon sa Bohol Bicycle Shop, naa sa P600 sa indibidwal ug P1200 sa relay. 

Hinuon gi-discourage sa mga tigpasiugda ang mga moapil nga walay tataw nga bansay ug wala pa maka-apil sa ingon niining offroad nga mga lumba, dala na sa kalisud nga kinahanglang sagubangon sa atleta aron taposon ang lumba. 

Matud ni Antequera Vice Mayor Simon Leo Jadulco, ang lumba mahitabo sa Marso 18, 2018 samtang kinahanglang ang mga mo-apil, makatambong sa race orientation sa Marso 17 sa hapon. 

Kinahanglan ang presensya sa mangapil sa lumba sa orientaion sanglit may mga balaod sa paduwa nga kinahanglan gayud nga masabtan aron dili mataktak sa paduwa mga may dagkong premyo. 

Bukas alang sa 16 anyos pa taas, ang Antequera Duathlon motugot lamang sa paggamit sa 26, 27.5 ug 29 nga ligid sa mountain bike nga may labing gamay 1.9 nga ligid. 

Ug tungod kay dinhi sa Bohol, gipili ang matang sa turismo nga may pagtahud sa kalikopan, ang duathlon gihimo na usab nga leave no trace nga lumba, segun pa ni Vice Mayor Jadulco. 

Sa lumba, walay plastic ug walay basura nga ilabay samtang ang mangapil maoy magdala sa ilang mga probisyon sama sa water bottle o hydration pack para wala nay baso nga gamiton kon mangayog tubig sa mga aid stations. 

Sa miaging tuig, sa Antequera usab nahitabo ang usa ka lumba sa cross country ug kini usa ka fund raiser alang sa usa ka Kapilya. 

Buot sa mga opisyales sa lungsod nga ilhon usab ang Antequera nga may maayong mga trails alang sa endurance mountainbike bisan pa nga ang lungsod giila na sa tibuok lalawigan nga basket capital niini, ug sa tibuok na nga Pilipinas. (rahc/PIA-7/Bohol) 
Magpadayong ang bansay ug pakondisyon sa mga atletang Bol-anon tungod kay bisan nagpadayon ang pakondisyon alang sa lumba sa Alicia, mangandan na usan alang sa Antequera Duathlon 2018 kanus-a himoon ang trail run, bike nga mga lumba sulod sa usa ka adlaw. (rahc/PIA-7/Bohol)











No comments: