Bag-ong LPA, gibantayan sa PAGASA; 

mosulod sa nasod ugma sa buntag 

TAGBILARAN CITY, Pebrero 22 (PIA)--Usa ka bag-ong Low Pressure Area (LPA) ang gibantayan karon sa Philippine Atmospheric, Geophysical and Astronomical Services Administration (PAGASA) nga naa pa gawas sa nasod. 

Matud pa ni PAGASA Weather Specialist Ariel Rojas, katapusang nasigpatan ganinang buntag sa PAGASA ang LPA sa gilay-ong 1,825 kilometros sidlakang bahin sa Mindanao. 

Si Rojas nagkanayon nga sa pagkakaron, gamay pa ang tsana nga mahimo kining usa ka hingpit nga bagyo. 

Apan kun mokusog kini ug mahimong tropical depression samtang naa sa sulod sa Philippine Area of Responsibility (PAR), tawagon kini og “Caloy”. 

Ugma sa buntag kini gipaabot nga mosulod sa nasod. 

Samtang nagkaduol kini sa Pilipinas, maka-apekto na ang maong LPA sa Eastern Visayas o Eastern Mindanao ugma sa gabii o di kaha sa Sabado sa buntag. (ecb/PIA7-Bohol) 

================

Bag-ong ‘guidelines’ sa mga resort sa 

nasod, gitakdang ipagawas sa DOT 

TAGBILARAN CITY, Pebrero 22 (PIA)--Gitakdang magpagawas og bag-ong ‘guidelines’ o sumbanan ang Department of Tourism (DOT) alang sa mga negosyanteng nag-planong magbukas og resort sa Pilipinas. 

Kini human sa nagka-grabeng problema sa ‘sewerage system’ sa isla sa Boracay diin direktang naadto sa dagat ang mga hugaw sa tawo gikan sa mga establisimiyento. 

Matud pa ni Tourism Undersecretary Ricky Alegre, obligahon nila ang mga resorts nga magbaton og ‘water treatment facility’. 

Giingong hatagan usab nila og tagal nga unom ka buwan ang mga resorts nga makapahimo sa mga wala pa’y ‘water treatment facility’ aron mosunod ang kamanduan. 

Una nang miingon si Presidente Rodrigo Duterte nga iya lamang hatagan og unom ka buwan nga tagal ang Department Environment and Natural Resources (DENR) aron mapangitaan og solusyon ang nagka-grabeng problema sa polusyon sa Boracay nga una na niyang gitawag nga ‘cesspool’ o hugaw. 

Human sa Boracay, nipasidaan usab ang Presidente nga isunod nga ipasarado ang mga business establishment sa lungsod sa Panglao human makaabot niya nga sama sa Boracay Island, problema na usab sa Panglao Island ang dili saktong paglabay sa mga basura sa mga resorts dinhi. (ecb/PIA7-Bohol)