Tuesday, February 27, 2018


Bag-ong SWAD building sa
Bohol, gisubhan sa DSWD-7 

TAGBILARAN CITY, Pebrero 26 (PIA)--Gisubhan sa Department of Social Welfare and Development (DSWD) Field Office VII ning bag-o lang ang ilang bag-ong Social Welfare and Development (SWAD) Bohol Office building dinhi sa lalawigan dungan sa kasaulogan sa ilang ika-67 nga founding anniversary. 

Si Rev. Fr. Marcelo Operiano, Jr. sa St. Augustine Parish sa lungsod sa Panglao ang nisaulog sa misa pasalamat ug pagpanalangin sa bag-ong SWAD Bohol. 

Sumala pa ni SWAD Bohol Team Leader Papiasa Bustrillos, ang maong building maoy katumanan sa ilang mga damgo nga makaangkon og kaugali­ngong edipisyo sa Bohol.

“We are grateful for the Provincial Government of Bohol especially to Governor Edgar Chatto for providing this lot to the DSWD so that we can construct a new building and this will inspire us more to provide the best service to all Boholanos especially those are needy,” matud pa ni Bustrillos. 

Ang two-storey building nahimutang sa dalan M. Parras, Circumferential Road, Dampas District, ning syudad nga buhatan karon sa mga kawani sa SWAD Bohol nga nadestino sa Expanded-Assistance to Individual in Crisis Situations (E-AICS), Pantawid Pamilyang Pilipino Program ug Sustainable Livelihood Program (SLP). 

Ang maong bag-ong building dunay kaugalingong warehouse alang sa non-food items ug family food packs nga andam ipang-apud-apod panahon sa kalamidad. 

Si Bohol Gob. Edgar Chatto uban sa pipila ka mga miyembro sa Sangguniang Panlalawigan ug Municipal Mayors nitambong sa maong inagurasyon. (ecb/PIA7-Bohol) 
Gipangunahan nila Gob. Edgar Chatto ug SWAD Bohol Team Leader Papiasa Bustrillos ang pagputol sa laso atol sa pagsubo sa bag-ong SWAD building dinhi sa Bohol nga nahimutang sa dalan M. Parras, Circumferential Road, Dampas District, ning syudad. (hulagway sa DSWD-7)

No comments: