Monday, February 19, 2018

Bike for Peace sa 47IB
himoon sa Marso 17 

TAGBILARAN CITY, February 18 (PIA)--Dungan sa kasumaran sa 47th Infantry Katapatan Battalion karong umaabut nga Marso 17, usa ka pagpakita sa kusog ang ilang pasiugdahan dinhi sa Bohol. 

Sanglit sila ang nagpabilin nga military unit ug padayong nagpatunhay sa kalinaw sa lalawigan ilabi na atubangan sa hulga sa terorismo, usa ka Bike for Peace ang ilang pasiugdahan paghandum sa ilang katukoran. 

Ang bike for peace, maglangkub sa 110 kilometros nga ruta gikan sa ilang kampo sa Macaas-Cabulihan Tubigon, paingon sa Tagbilaran ug balik sa Tubigon subay sa coastal highway sa Loon. 

Ang Bike for Peace usa lamang sa mga kalihukan sa paghandum sa kasumaran sa 47 IB. 

Mogikan ang bahan sa mga bikers sa Tubigon sa may alas 5 sa sayong buntag paingon sa Macaas-Catigbian ngadto sa Corella ug dayon na sa Tagbilaran didto sa ICM alang sa gamay nga pamahaw. 

Human sa pamahaw, mosubay ang grupo balik sa Tubigon subay sa CPG North paingon sa Cortes, Maribojoc, Loon, Calape ug Tubigon. 

Niini, giaghat sa mga tinugyanan sa militar ang mga sakop sa mga kahugpungan sa mga tig bisekleta sa pagduyog sa ilang kalihukan. 

Matud sa mga tinugyanan sa 47IB pinaagi ni Lt. Col Eufracio Malig, ilang isipon ang pagsalmot sa katawhan nga buhing suporta sa mga kasundalohan sa 47 IB nga nagpadayong nakigbisog aron mapatunhay ang kalinaw sa Bohol. 

Subay usab niini, giaghat ang mga pundok sa mga bikers sa pagpalista sa ilang mga pundok ug mga sakop nga mouban sa kalihukan alang sa dungang pangandam nga pagahimoon.

No comments: