Bohol, andam na sa 

CVIRAA 2018 hosting 

TAGBILARAN CITY, Pebrero 21 (PIA)--Andam na ang lalawigan sa Bohol sa pag-host sa 2018 Central Visayas Regional Athletic Association (CVRAA) Meet. 

Si Gob. Edgar Chatto nakigkita niadtong Martes sa nagkalain-laing stakeholders ug organizers alang ning tinuig nga rehiyonal nga paugnat sa kusog. 

Gibutyag ni Department of Education (DepEd) Division of Bohol Superintendent Dr. Wilfreda Bongalos nga ang Bohol mo-abiabi sa 11,737 ka delegado gikan sa 19 ka dibisyon sa tibuok Central Visayas. 

Magsugod ang mga aktibidad sa CVRAA sa Pebrero 23, apan pormal kining buksan sa Pebrero 25 diin si Presidential Spokesman Harry Roque ang gidapit isip keynote speaker. 

Buksan kini pinaagi sa Balaang Misa sa may alas 2 sa pales ug pagasundan sa parada sa alas 3:30 sa pales paingon ngadto sa CPG Sports Complex alang sa opening ceremonies sa may alas 5:30 sa hapon. 

Usa ka Task Force ang gimugna aron magbantay sa kalinaw ug seguridad atol sa pagpahigayon sa CVRAA Meet nga molanat taman Marso 4. 

Usa ka small scale ASEAN model usab ang gi-andam sa Bohol police provincial office nga gipangunahan ni Provincial Director Sr. Supt. Angeles Geñorga. 

Si Geñorga nagkanayon nga mga 700 ka personnel ang idugang sa pwersa gikan sa nagkalain-laing lungsod ning lalawigan aron maseguro ang seguridad sa mga delegado samtang nia sila sa lalawigan. 

Tinguha sa Bohol PNP ang ‘zero incidence related ‘sa CVRAA meet. (ecb/PIA7-Bohol) 

===============

4 ka proyekto sa Bohol nga nagkantidad 

og P229-B, gi-aprobahan sa NEDA 

TAGBILARAN CITY, Pebrero 21 (PIA)--Ang National Economic Development Authority (NEDA) mi-aprobar sa upat ka mega infrastructure projects nga e-implementar sa Bohol sa umaabot nga mga katuigan isip parte sa 75 ka priority projects nga gi-kumpirmar sa ahensiya. 

Ang maong upat ka dagkong proyekto sa Bohol nagkantidad og P229 bilyones. 

Sa bag-ong gipagawas nga listahan sa NEDA, ang upat ka mga dagkong proyekto sa Bohol mao ang: P124.150-B Cebu-Bohol Link Bridge; P96.280-B Bohol-Leyte Link Bridge; P4.134-B Bohol Northeast Basin Multipurpose Project; ug ang P 4.570-B proyekto alang sa dugang pasilidad sa New Panglao Bohol Airport. 

Ang mga opisyales sa lalawigan sa Bohol nihimo sa pagfollow-up sa maong mga proyekto ug gihatagan kini og pagtagad sa Bol-anon nga Socioeconomic Planning Secretary ug Director General sa NEDA nga si Dr. Ernesto Pernia ug NEDA Undersecretary Rolando Tungpalan. 

Ang pagdagayday sa mga proyekto sa Bohol napili sa 4,000 ka gitahong mga aplikante alang sa pagtagad sa NEDA, matud pa sa mga consultants. 

Kadaghanan niini mahimong parte sa “Build Build Build” program sa gobyerno aron bag-ohon ang atong pasilidad sa imprastraktura, magmugna og mga trabaho ug mapauswag ang atong ‘competitiveness’ uban sa gawas sa kalibotan. 

Giingong pipila ka trilyon ka pesos ang magasto hangtod sa pagtapos sa administrasyon ni Duterte sa 2021 diin pipila niini ang pagapondohan sa bag-o lang gi-aprobahan nga TRAIN tax reforms sa Department of Finance. (ecb/PIA7-Bohol)