Bol-anon bag-o nga kampyon 

Sa Kinatkatay, lumba sa MTB 

The Farm, Cambaol, Alicia, Bohol February 11 (PIA)—Sa labing kulbahinam nga lumba sa bisekleta, taytay sa bukobuko sa mga nagsapong nga kabungturan sa Cambaol, Alicia, giilog sa usa ka Bol-anon ang korona isip labing hawod sa Kinatkatay sa Binabaje, Alicia MountainBike Festival 2018 alang sa Elite Division niadtong Febrero 11. 

Si Nicho Lumay, usa ka inilang Bol-anong kusgan sa bisekleta, miilog sa trono gikan ni Dongkey Sanches (Lapu-Lapu City), usa sa mga giilang bitoon sa extreme mountain bike sa Pilipinas, kinsa usab maoy nahimong champion sa Kinatkatay 2017. 

Si Lumay, nga taga Batuan, Bohol una nga mitadlas sa finish line human sa 47 minutos ug 10 segundos, samtang si Sanchez wala gyud mabingat nga naggukod ug nabiyaan lamang sa 30 segundos human sa kapin sa 16 kilometros nga sikad sa bisekleta gikan sa starting line sa plaza sa Alicia ngadto na sa Cambaol diin gitungas ang elevation nga molapas pa sa 250 metros. 

Una nga milagbas si Lumay sa katunga nga marker sa lumbaanan human masaka ug mapadulhog na sa mga bungtod nga molapas pa sa 200 metros kansang mga tungason gi-ingon na nga usa sa labing taas nga tungason sa lumba sa bisekleta dinhi sa Bohol. 

Hinuon, si Sanchez, kinsa bag-o lang miani sa mga kampeonato sa cross country bike race sa Getafe ug sa Negros Occidental, wala mabitay nga nagsundot kang Lumay, wala ray 2 minutos human sa ika 8 ka kilometro sa nag saka-kanaug sa mga nagbawod nga mga bungtod. 

Si Sanchez usab, wala lung-i sa paggukod sa mga kauban sa team ni Lumay, kinsa usa sa mga gitahod nga racer sa Paseo de Loon. 

Permi nga naa sa tikod ni Sanchez ang way puas nga hagit-atake nila ni Jonathan Pagaura (Maribojoc) ug Victor Biongcog (Dagohoy) aron luyahon ug i-isolate si Sanchez sa kauban niini nga si Emmanuel Pedrosa (Lilo-an Cebu). 

Si Sanchez, kinsa miangkon nga wala siya kapangandam sa kalisud sa pag-dagan guyod ang bisekleta sa mga sections nga subra ka technical ilabi na sa mga tungason nga apike sikaron, mitabok sa finish line nga way undang nga sikad, 47 minutos ug 40 segundos, uban sa pag-abiba sa mga manan-away nga taga Alicia ug mga dayo didto. 

Sa laing bahin, Jonathan Pagaura kinsa nagpunay’g sundot kang Sanchez mitapos sa lumba sa 48 minutos ug 10 segundos, o 30 segundos sunod ni Sanchez. 

Si Victor Bioncog, kinsa naghimo sa pagkingaw kang Pedrosa aron dili makaduol sa ginukdanay nila ni Lumay, Sanchez ug Pagaura, mitabok sa linya sa mga mananaug sa 48 minutos ug 55 segundos, gamit ang iyang alas: ang pagsprint sa katapusang kilometro ngadto sa finish line dihang tataw na nga na-una na si Lumay. 

Bisan nga gibilin nga nagkamaskamas, si Pedrosa wala mounding sa paggukod apan mitadlas sa linya sa 49 minutos ug 55 segundos, usa ka minuto human nakatabok si Bioncog sa linya. 

Ang Kinatkatay sa Binabaje, usa ka tinuig nga halad-hagit sa Alicia sa lumba sa cross country, enduro ug exterra nga kalidad sa gukod sa mga labing hawod sa bisekleta. 

Ang nasampit nga lumba adto himoon sa mga kabingturan nga sakop sa Cambaol, diin usab mahimutang ang The Alicia Panoramic Park (TAPP). 

Ang TAPP maoy labing sikat na nga produktong pangturismo sa Alicia, ug gilauman nga maoy himoong abyan sa lungsod sa paghatag kapanginabuhi-an sa iyang kabus nga mga molupyo aron mahaw-as sa kawad-on, segun pa ni Mayor Marnilou Ayuban. (rahc/PIA-7/Bohol) 

Si Nicho Lumay miilog sa korona nga gihuptan ni kanhi champion sa Kinatkatay sa binabaje 2017 nga si Dongkey Sanchez sa elite category. Sa kaporsigido nga mogawas nga mananaug ang Bol-anon, napakita niya nga dili diay kita iwit niining duwa sa lumba sa bisekleta. (rahc/PIA-7/Bohol)