DA magpatukod og 

molecular lab dinhi

TAGBILARAN CITY, February 5 (PIA)--Dili pa igo nga ipadala dinhi sa Department of Agriculture (DA) ang 5,000 ka baka nga gatasan, ug ang P30 milyones nga pasiunang abag sa mga mangagatas, tukoran pa usab dinhi sa Bohol ang usa ka molecular laboratory. 

Ang pagtukod sa molecular laboratory, ang labing una dinhi sa nasud, magtabang sa pagpalig-on sa industriya sa panggatasan (dairy) sa Bohol, ug maoy sentro na unya sa suporta alang sa pagpasanay sa baka og kabaw ug sa paghimong pagtuon aron pagbuntog sa sakit og dangan nga mopatumba unya sa industriya. 

Kini maoy gibutyag ni DR Secretary Emmanuel Piñol atubangan sa mga stakeholders ug mga mag-uuma nga nangalima og hayop para gatasan dinhi subay sa laraw sa kagamhanan nga himoong sentro sa dairy industry sa nasud ang Bohol. 

Sa molecular laboratory, didto himoon sa mga siyentipiko ang nuclear ug biological nga mga proseso aron alimahan ang mga semilya sa baka nga breeder nga maoy gamiton usab alang sa atrificial insemination aron magsabak ang mga gatasan. 

Gawas nga magamit alang sa pagpupo sa semilya aron magamit alang sa artificial insemination, nga napamatud-an na nga mas kasaligan sa mas paspas nga pagpabunti sa hayop, sa molecular laboratory usab himoon ang mga siyentipikong manipulasyon aron pilion nga mas daghang babaye nga nati ang ipanganak kay sa laki. 

Usa sa mga long range nga laraw sa DA ang pagpang-apud apod sa 240 ka nati ngadto sa mga kooperatiba, kinsa maoy magpatambok niini ug mag-alima hangtud nga ila na usab kining kakuhaan sa gatas.

Gipadayag na ni Piñol nga iliwag na nila ang sistema sa programa sa dispersal nga gisunod sa kagamhanan kaniadto. 

Nagkanayon si Piñol nga sa tagsa-tagsa ka baka o kabaw nga dispersal, sa kakabus sa mag-uuma, dali ra kining mabaligya o maihaw ilabi na kon ang banay wala nay kan-on. 

Sa dinaghan nga dispersal, dason ni Piñol nga ang kooperatiba maoy magbu-ot inay usa ka tawo lamang ang modesidir kon unsay buhaton sa hayopan nga gialimahan. 

Gawas pa, ang molecular laboratory makatabang usab sa pagpatunhay sa maayong genes alang sa hayop nga padaghanon, ug mas sayon na lang ang paghimog mga pamaagi sa pag control sa sakit nga motakod unya sa mga hayupan.

Gipresentar usab sa DA ang mga siyentipiko nga ilang ikaabag alang sa pagpadagan sa nasampit nga laboratory. (rahc/PIA-7/Bohol)

Gipasabut ni DA Sec Piñol ngadto sa mga Bol-anon ang tabang alang sa katukoran sa molecular laboratory nga ipatulod sa DA sa Ubay Stock Farm. Gawas nga trabaho sa molecular laboratory ang pagpupo sa semilya alang sa artificial insemination, mahimo usab niini nga tun-an aron mas daghang babaye kay sa lalaki nga nati ang ipanganak aron mapadali ang pagpadaghan sa baka nga girolando dinhi. (rahc/PIA-7/Bohol)