DFA, magpatuman og 1-day suspensiyon sa processing sa ‘Red Ribbon,’ slots sa online passport appointments, padayong gibuksan matag adlaw 

TAGBILARAN CITY, Pebrero 01 (PIA)--Nihatag og abiso ang Department of Foreign Affairs–Office of Consular Affairs (DFA-OCA) sa publiko nga magpatuman sila og pila ka adlaw nga suspensiyon sa ‘one working day processing’ sa mga dokumentong “for authentication” o “Red-ribbon.”

Ang suspensiyon ipatuman sugod Pebrero 15 taman 19.

Base sa public advisory nga gipagawas sa DFA sa ilang twitter account, kinahanglan nilang magpahigayon og system maintenance ug upgrade.

Apan giseguro sa buhatan nga padayon pa gihapon ang regular processing sa mga dokumento nga “for authentication” nga molanat og upat ka adlaw.

Kalabot niini, nangayo og pasaylo ug pagsabot ang DFA-OCA sa publiko ug mipasalig nga mobalik sa normal ang operasyon sa Pebrero 20.

Samtang gipahibalo usab sa DFA pinaagi sa ilang social media sites nga padayon ang pagbukas nila og slots alang sa online passport appointments.

Matud pa sa abiso sa DFA ngadto sa publiklo, matag adlaw sila nagbukas og slots alang ning buwan sa Pebrero hangtod sa Hunyo ning tuig.

Tungod niini, gi-abisohan sa DFA ang publiko nga bisitahon lamang kanunay ang ilang website alang sa online appointment. (ecb/PIA7-Bohol)

==============

Gobyerno, magtukod og ‘Malasakit Center’ 

sa 2 ka pampublikong tambalanan sa Bohol

TAGBILARAN CITY, February 01 (PIA)--Moabot na gyud ang panahon nga dili na kinahanglan pang moadto sa nagkalain-laing buhatang ahensiya sa gobyerno aron maglihok sa tabang pinansiyal ang mga kabos nga pasyente sa mga pampublikong tambalanan sa Bohol pinaagi sa katukoran sa ‘Malasakit Centers’ sa lalawigan.

Ang pasilidad itukod sa Governor Celestino Gallares Memorial Hospital (GCGMH) ning syudad sa Tagbilaran ug sa Don Emilio Del Valle Memorial Hospital sa lungsod sa Ubay.

Ang ‘Malasakit Center’ usa ka one-stop shop nga nagtinguhang ipasayon ug ipadali sa pagproseso sa pagpangayo og tabang gikan sa mga ahensiya sa gobyerno alang sa mga kabos nga Pilipino.

Pinaagi sa ‘Malasakit Center,’ daling maduolan sa mga pasyente ang mga ahensiyang mahimong makatabang sa ilang pagpatambal sama sa Department of Health (DOH), Department of Social Welfare and Development (DSWD), Philippine Health Insurance Corporation (Philhealth), Philippine Charity Sweepstakes Office (PCSO) ug uban pa. 

Matud pa ni GCGMH medical director Dr. Mutya Macuno, gipaabot nilang itukod ang “Malasakit Center” sulod sa ilang health facility sulod ning unang tunga sa tuig.

Gidugang pa ni Macuno nga nagpadayon ang pagtukod karon sa ‘Malasakit Center’ sa Vicente Sotto Memorial Medical Center sa Cebu ug isunod niini ang dinhi sa syudad sa Tagbilaran ug sa Ubay.

Susamang pasilidad usab ang gitakdang itukod sulod sa Eversely Child’s Sanitarium ug General Hospital, Saint Anthony Mother ug Child Hospital, ug sa Talisay District Hospital sa lalawigan sa Sugbo.

Sa niaging tuig, usa ka memorandum of agreement ang gilagdaan sa Office of the Presidential Assistant for the Visayas (OPAV) ug nagkalain-laing ahensiya sa gobyerno alang sa katukoran sa ‘Malasakit Centers’ sa Cebu ug Bohol isip pilot regions niining programa.

Ubos sa MOA, ang OPAV ang mo-pasilitar sa renobasyon sa mga lugar nga pagatukoran sa ‘Malasakit Center’ sulod sa mga pampublikong tambalanan, samtang ang DOH ang molihok isip central coordinating body sa mga serbisyo sa maong center.

Ang DSWD ang magbutang og social workers sa matag center nga mo-asister sa mga benepisyaryo sa Lingap sa Masa nga programa sa gobyerno, samtang ang PhilHealth usab ang magbutang og personnel sa center nga mohatag og ‘immediate assistance’ sa ilang miyembro. 

Ug ang PCSO ang magbutang og personnel nga maghatag og tukmang tabang ngadto sa mga kabos nga pasyente. (ecb/PIA7-Bohol)