Early registration, hangtod 

Peb. 28 na lang – DepEd 

TAGBILARAN CITY, Pebrero 20 (PIA)--Hangtod Pebrero 28, 2018 na lang ang gipahigayon nga early registration period sa Department of Education (DepEd) alang sa school year 2018-2019. 

Matud pa sa DepEd, gitakda nang matapos ang early registration o sayong pagpa-rehistro sa tanang public elementary, secondary ug senior high schools sa tibuok nasod mao nga angay kining pahimoslan sa mga ginikanan ug ipa-rehistro na ang ilang mga anak. 

Gisugdan sa DepEd ang sayo nga pagpa-rehisto niadtong Enero 28 pa. 

Tuyo niining sayo makapangandam ang mga tunghaan sa pagbukas sa klase alang sa sunod nga school year aron makab-ot ang target nilang gidaghanon sa mga estudyante nga mosulod sa tunghaan. 

Gusto usab sa DepEd nga masiguro nga tanang bata nga nagpangedaron og lima ka tuig na sa Agosto 31 nga ma-enroll sa Kindergarten. 

Ubos niining programa, ang mga tinun-an kinahanglang sayo nga magpa-rehistro sa mga tunghaan kung asa nila gustong motungha. 

Ang mga incoming o umaabot nga Kindergarten learners kinahanglang magdala og Philippine Statistics Authority (PSA) nga kanhi National Statistics Office (NSO) birth certificate ug kopya sa Early Childhood Development (ECD) checklist report gikan sa kanhi day care center nga gitunghaan niini. 

Samtang ang mga Grades 1, 7, ug 11 learners kinahanglang mo-prisinta sa ilang PSA birth certificate ug school report card. 

Subling nipahinumdom ang DepEd nga walay kinahanglang bayran sa eskwelahan ang mga magpa-enroll, agi og pagsunod sa gipatuman nga ‘no collection policy’ sa departamento. (ecb/PIA7-Bohol)