Kampanyang “Matino, Mahusay, at Maaasahang”

Barangay at SK Officials, gilusad sa DILG 

MANILA, Pebrero 08 (PIA)--Ang Department of the Interior and Local Government (DILG) milusad sa nasudnong kampanya alang sa "Matino, Mahusay, at Maaasahang" Barangay and SK Officials aron i-dasig ang publiko sa pagbotar sa maayong lider sa umaabot nga Barangay ug Sangguniang Kabataan (SK) Elections sa Mayo 14, 2018. 

Matud pa ni DILG OIC-Secretary Eduardo Año nga ang mga botante dili lamang angay mohimo sa ilang katungod sa pagbotar sa Mayo 14, apan angay usab nga mopili sila og mga lider nga nagbaton aning tulo ka minimum nga kinaiya nga importante sa pagpadagan sa makahulogang malinawon ug malambuong inisyatiba sa komunidad. 

Ang 'Matino, Mahusay, at Maasahan' nga kampanya alang sa Barangay ug SK Elections usa ka giya alang sa mga botante sa pagpili og angayan nga mga lider. 

Kini tungod kay matud pa naka-base man sa mga boto sa katawhan ang pagsugod sa kabag-ohan sa ilang mga barangay. Segun pa ni Año, ang usa ka opisyal sa barangay ug SK nga “Matino” o Mabuot nagbaton niining mga mosunod nga kinaiya: dili kurakot ug mobatok sa kahiwian; mobatok sa ilegal nga droga; matinud-anon sa serbisyo ug bukas sa publiko; maayo ug adunay disiplina; ug wala nalambigit sa dautang mga tawo o grupo.

Alang sa 'Mahusay' o Maayo nga kandidato, may plataporma kining pangkalamboan ug pangkahusayan; sulundon ug modelo sa iyang mga kabarangay; nagsunod sa lagda sa gobyerno ug sa komunidad; maayo ang relasyon sa mga kabarangay; ug may patas nga panglantaw sa nagkalain-laing problema sa barangay. 

Samtang alang sa 'Maaasahan' o Kasaligan nga kandidato, may mga mosunod kining kinaiya: maalamon ug adunay abilidad sa pag-plano; alistong motabang sa panahon sa kalamidad; may kabalaka sa isig-katawo; daling duolan sa oras sa panginahanglan; ug napamatud-an na sa pagtabang sa pagpadayon sa kalinaw ug kahusay. 

Tungod niini, nanawagan ang DILG sa mga botante nga dili usikan ang ilang boto ug huna-hunaon og maayo ang ibotar nga mga lider sa ilang komunidad tungod kay sulod sa tulo ka tuig, sila man ang mamuno sa ilang mga barangay, sa ilang mga kabataan, sa paggamit sa pondo sa barangay ug pagduso sa kabag-ohan sa ilang mga komunidad. (ecb/PIA7-Bohol) 

==============

PWD discount sa tanang pampubli-

kong sakyanan, gimando sa LTFRB 

TAGBILARAN CITY, Pebrero 08 (PIA)--Gimando sa Land Transportation Franchising and Regulatory Board (LTFRB) ang paghatag og diskuwento sa pletehan sa mga Persons With Disabilities (PWD’s) sa tanang mga public utility operators ug drivers. 

Base sa gipagawas nga memorandum circular sa LTFRB, may 20 porsiyentong diskwento sa pletehan ang mga PWD’s sa mga jeepney, bus, taxi, UV express ug bisan sa mga Transport Network Vehicles Service (TNVS) sama sa Uber ug Grab. 

Giingong kinahanglan lamang ipakita sa PWD’s ang ilang identification cards nga gi-isyu sa National Council on the Welfare of Disabled Persons kun mobayad sila sa ilang plete. 

Mag-atubang og silot ang bisan kinsang dili mosunod niining kamanduan sa LTFRB. 

May multang P5,000 alang sa unang paglapas, samtang P10,000 ug unom ka buwang suspensiyon sa Certificate of Public Convenience (CPC) alang sa ikaduhang paglapas. 

Apan sa ikatulong paglapas sa maong kamanduan, kanselasyon sa prangkisa na ang ipahamtang. (ecb/PIA7-Bohol)