Labing unang National Information 

Convention, ipahigayon sunod semana 

TAGBILARAN CITY, Pebrero 12 (PIA)--Gitakdang ipahigayon ang labing unang National Information Convention (NIC) karong Pebrero 19 hangtod 21, 2018 didto sa SMX Convention Center sa syudad sa Davao. 

Ang NIC 2018 maghatag og kahigayonan sa mga sumasalmot sa pagsabot gi-unsa sa administrasyon ni Presidente Rodrigo Duterte sa pag-komunikar sa key policy initiatives niini. 

Matud pa ni Philippine Information Agency (PIA) Director-General Harold Clavite, ang NIC 2018 mo-highlight sa responsableng panag-ambit sa impormasyon o responsible sharing of information ug paggamit sa communication platforms sa paghatag og kasayoran nga makatabang sa pagpa-usbaw sa kalidad sa kinabuhi sa mga tumatambong, pagpalig-on sa private ug public communicators ug pag-organisa og kalihokan nga maka-pagahom sa komunidad. 

Samtang si Presidential Communications Operations Office (PCOO) Kalihim Martin Andanar nagkanayon nga mailhan sa maong convention ang mga lider sa mga ahensiya diin makita ang kapin sa 1,500 ka mga information officers sa tibuok nasod. 

Gidugang usab ni Andanar nga daghang makat-onan sa maong 3-day event tungod kay daghang speakers ang mopa-ambit sa ilang kahibalo diin apil sa makat-onan ang kaugmaon sa Philippine Broadcasting. 

Gawas sa mga maayong speaker, makita sa convention ang mga bag-ong teknolohiya sa larangan sa brodkasting. 

May plenary session usab kalabot sa fake news sa maong convention. 

Gipaabot nga motambong si Presidente Duterte sa convention diin siya ang keynote speaker. (ecb/PIA7-Bohol) 

===============

Signal Number 1, gi-isa sa Bohol ug kapin 

20 ka lugar tungod sa bagyong Basyang 

TAGBILARAN CITY, Pebrero 12 (PIA)--Halos mihinay ang bagyong Basyang samtang naglihok kini sa direksyong kasadpan. 

Kataposang nasigpatan sa Philippine Atmospheric Geophysical and Astronomical Services Administration (PAGASA) ang bagyo sa gilay-ong 620 kilometros sidlakang habagatang-sidlakan sa Hinatuan, Surigao del Sur. 

Dala sa bagyo ang kusog nga hanging mokabat sa 65 kilometros matag oras ug paghuros nga mokabat sa 80 kilometros matag oras. 

Naglihok ang bagyo pa-kasadpan amihanang kasadpan sa kusog nga 22 kilometros matag oras. 

Naka-isa ang signal number 2 sa Surigao del Sur samtang signal number 1 sa Southern portion sa Samar, southern portion sa Eastern Samar, Leyte, Southern Leyte, Bohol, Cebu, Negros Oriental ug Siquijor Dinagat Islands, Surigao del Norte, Agusan del Norte, Agusan del Sur, Camiguin, Compostela Valley, Davao Oriental, Davao del Norte, Misamis Oriental, Misamis Occidental, Lanao del Norte, Lanao del Sur, Bukidnon, ug northern portion sa Zamboanga del Norte 

Matud pa sa PAGASA, gipaabot ang kasarangan ngadto sa kusog nga pag-ulan sa Eastern Visayas, Central Visayas, Caraga, Northern Mindanao, Davao Region ug Zamboanga Peninsula sulod sa 24 oras. 

Gitambagan usab ang mga residente sa mga nahisgotang lugar nga mag-amping batok sa posibleng pagbaha ug pagdahili sa mga yuta. 

Gipaabot nga mo-igo sa kayutaan ang bagyo ugma sa buntag, Pebrero 13 sa parte sa rehiyon sa Caraga. 

Makuyaw ang paglayag sa mga seaboards sa Northern Luzon, eastern seaboards sa Central ug Southern Luzon, Eastern Visayas, ug mga lugar nga naa ubos sa Tropical Cyclone Warning Signal. (ecb/PIA7-Bohol)