Libreng irigasyon alang sa mga mag-uuma 

sa tibuok nasod, aprubado na 

MANILA, Pebrero 09 (PIA)--Gilagdaan na ni Presidente Rodrigo Duterte isip hingpit nang balaod ang Republic Act No. 10969 o Free Irrigation Service Act. 

Base sa maong balaod, dili na pabayron og irrigation fees sa National Irrigation Authority (NIA) ug uban pang state agencies ug irrigation association ang mga mag-uuma nga ang gipanag-iyang yuta dili molapas ang sukod sa 8 ektarya. 

Dili na usab pabayran sa mga mag-uuma ang mga utang nga irrigation fees, interest ug penalties sa NIA apil na usab ang mga utang sa mga asosasyon sa irigasyon. 

Si Davao City Representative Karlo Nograles, Chairman sa House Appropriations Committee nagkanayon nga tungod sa maong balaod, magbaton na og dugang kita ang mga mag-uuma ug maghatag usab kini og dalan alang sa modernisasyon sa sektor sa agrikultura sa nasod. 

Sa bersyon sa Senado sa maong balaod, ang mga mag-uuma nga may gipanag-iyang yuta nga lima ka ektarya paubos ang ilibre sa irigasyon apan gipatas-an kini sa pinal nga bersyon. 

Ang paglagda sa maong balaod gihimo sa Presidente niadtong Pebrero 2. 

Samtang niadtong Pebrero 7, gilagdaan usab ni Duterte ang RA 10970 nga nagdeklarar sa Agosto 25 matag tuig isip National Tech-Voc Day. (ecb/PIA7-Bohol) 

os. (038) 501-8554/ 412-2292 email piabohol171@yahoo.com 

================

‘Speed limit,’ 

ipatuman na sa LGUs 

TAGBILARAN CITY, Pebrero 09 (PIA)--Magpatuman na og ‘speed limit’ ang mga lokal nga kagamhanan sa ilang mga karsada. 

Kini, agi og pagsunod sa Joint Memorandum Circular 20118 – 001 tali sa Department of Transportation (DOTr), Department of Public Works and Highways (DPWH) ug Department of Interior and Local Government (DILG). 

Tuyo niining malikayan ang mga aksidente sa kadalanan pinaagi sa pag-agni sa mga local government unit (LGUs) sa pagpalabang og ordinansa aron han-ayon ang ilang mga karsada ug magtakda og speed limit. 

Gi-proponer ang 20 kilometros matag oras nga speed limit sa mga barangay road o sa karsadang gip-ot ug daghang tawo. 

Samtang sa mga highway tugotan ang 80 kilometros matag oras sa mga kotse ug motorsiklo, ug 50 kilometros matag oras alang usab sa mga bus ug trak. 

Pahamtangan og silot ang mga molapas sa ordinansa ug mahimong pabayron og multang taman P3,000.00 o posibilidad nga ma-impound ang sakyanan ug pagka-bilango. (ecb/PIA7-Bohol) 

===============

Kaso sa dengue sa Bohol, 

nikunhod og 64% 

TAGBILARAN CITY, Pebrero 09 (PIA)--Nikunhod ang gidaghanon sa kaso sa sakit nga dengue sa lalawigan sa Bohol niadtong niaging tuig ngadto sa 64.28 porsiyento kun itandi sa natala niadtong tuig 2016. 

Base sa talaan sa Provincial Epidemiology and Surveillance Unit (PESU), 1,028 ka kaso sa dengue ang natala gikan Enero 1 ngadto sa Disyembre 31 tuig 2017. 

Ang maong datos nagpakita og dakong pankunhod diin ang PESU nakatala og 2,878 ka kaso sa dengue niadtong tuig 2016. 

Base usab sa datos sa PESU, ni minos ang gidaghanon sa nangamatay tungod sa maong sakit ngadto sa walo sa 2017 gikan sa 20 niadtong tuig 2016. 

Kadaghanan sa natakboyan sa maong sakit may edad 1 ngadto 5 anyos, samtang sobra gamay sa katunga ang lalaki sa 56.1%. 

Kinadaghanan nga may natalang kaso sa sakit nga dengue sa Bohol ang syudad sa Tagbilaran nga nakatala og 219 diin 2 niini ang namatay. 

May 81 ka kaso sa lungsod sa Carmen, 77 sa Talibon, 64 sa Dauis ug 46 usab sa Panglao, base sa talaan sa PESU. 

Matud pa sa Provincial Health Office (PHO), gihingosgan nila ang ilang ‘awareness campaign’ sa mga angay buhaton aron makunhoran ang risgo sa sakit nga dengue sa mga komunidad. (ecb/PIA7-Bohol)