Napahiuli nga simbahan sa 

Baclayon gibuksan na usab 

BACLAYON, Bohol, February 27 7(PIA7)--Opisyal na nga gitugyan sa kagamhanan kinsa maoy nagpundo og nagdumala sa pagpahiuli sa karaang simbahan sa Baclayon ngadto sa Diyosesis sa Tagbilaran, February 27, 2018. 

Didto gidawat usab sa diyosesis sa Tagbilaran pinaagi ni Obispo Albert Uy human ipasalig ngadto sa National Historical Commission of the Philippines (NHCP) pinaagi ni chairman Atty. Rene Escalante ang napahiuli na nga simbahan atul sa usa ka seremonyas sa wala pa pormal nga gibuksan ang mga pultahan sa karaang simbahan. 

Ang pagtugyan, gisaksihan nila ni Apostolic Nuncio to the Philippines ug Archbishop sa Italya nga si Gabriele Giordano Caccia sa ngalan sa simbahang Romano Catolico ug mga lokal nga opisyales punangulohan nila ni Cabinet Secretary Leoncio Evasco, Gobernador Edgar Chatto, Kongresista Arthur Yap ug mga sakop sa simbahang Bol-anon. 

Kahinumduman nga ang simbahan sa Baclayon, gisirad-an ngadto sa publiko human malumpag ang kampanaryo niini ug maapektohi ang mga bongbong nga bato ug flying buttresses niini dala sa dakong linog niadtong Oktubre 13, 2013. 

Niini, nahingawa ang mga katiguwangan sa Baclayon tungod sa ka walay kasegurohan nga ikapabarug pa og balik ang karaang kampanaryo dala sa walay pundo ang simbahan alang niini. 

Ang simbahan sa Baclayon natukod pinaagi sa mga Heswita nga misyonero nga sila Reverendo Padre Gabriel Sanchez ug Juan de Torres niadtong 1596 dinhi diin gitahud nga nasugdan ang labing unang katilingbang Kristyanos sa Bohol. 

Ang kasamtangan nga simbahang ginama sa gikamada nga bato, gisugdan niadtong 1717 ug giadornohan sa mga karaang kabtangan nga dala pa sa mga prayle ug kadtong ginama sa mga lokal nga panday apan nagkopya sa arkitekto ug disenyong Spanish baroque ug ang mas gikaintapan nga baroque rococo, matang sa arte nga napauso sa Europa niadtong siglo 16 ngadto sa siglo 17. 

Giisip nga bugtong simbahang nakapabiling nagpadayag sa labing tataw nga interior nga wa gayud matandog bisan sa pipila na ka katuigan ang nanglabay, ang simbahan nga gihalad sa Inmaculada Concepcion dela Virgin Maria nadeklara nga Nasudnong Kulturanhong Bahandi ug Mahinungdanong Kulturanhong Propyedad sa kagamhanan. 

Tungod niini, obligado na ang kagamhanan nga atimanon ug amomahon ang simbahan isip usa ka dugokan sa kultura sa katawhan, hinungdan nga may pundo nga gipahat alang sa gastoso nga pagpahiuli niini sa karaang dagway. 

Giangkon usab sa NHCP kinsa maoy gitugyanan sa pagdumala sa pagpahiuli sa simbahan nga usa ka dakong hagit ang pagpahiuli tungod kay kinahanglang mapabilin gayud ang karaang dagway sa aimbahan samtang kinahanglang gamiton ang mga materyales nga dili iglahi sa mga gigamit sa pagtukod niini. 

Human sa upat ka tuig ug upat ka buwan nga pagsira, gibuksan ang simbahan alang.sa katawhan human usab sa yano nga seremonyas nga gisundan sa santos nga misang gisaulog ni Arsobispo Caccia ug Obispo Abet Uy. 

Ang simbahan sa Baclayon maoy ika upat nga simbahan nga napahiuli human madaut sa linug niadtong 2013. 

Una na nga natugyan sa Diyosesis sa Tagbilaran ang mga Simbahan sa Asuncion sa Dauis, sa Santisima Trinidad sa Loay ug ngadto sa Diyosesis sa Talibon ang simbahan ni San Pablo sa Inabanga dili pa lamang dugay. 

Gawas sa mga simbahan, gipundohan usab sa kagamhanan ang mga bantayang tore ug mga kota sama sa bantayan sa Dauis, Balilihan, Maribojoc, Loay ug sa Baclayon. 

Napahiuli na usab ang karaang Kapitolyo sa Bohol ug ang Tribunal sulod sa Church Complex sa Loay. (rahc/pia-7/Bohol)