Thursday, February 08, 2018

Oplan Sita sa motorista
ipadayon sa Tagbilaran


TAGBILARAN CITY, February 7 (PIA)--Ipadayon gihapon sa kapolisan sa syudad ang Oplan Sita nga magpakatag sa kapolisan sa mga kadalanan sa syudad sugod sa alas 9:00 sa gabii ngadto sa alas 5:00 sa sayong buntag. 

Kini maoy gibutyag ni Police Superintendent Patricio Degay, agi og pagtubag sa panginahanglan nga kunhoran kon dili man ugaling papason ang aksidente sa kadalanan dala na sa mga iresponsable nga mga motorista. 

Gikan sa Disyembre 2017 ngadto sa Enero 2018, mikabat sa 78 ka insedente sa trapilo ang nagbutang sa syudad sa tagbilaran sa ika upat nga dapit sa Bohol diin may labing daghang aksidente. 

Kini dili madawat sa hepe sa kapolisan tungod kay maghatag kinig dili maayong hulagway sa Tagbilaran nga dili maayo sa negosyo ug sa luwas nga pinuy-anan. 

Tungod kay ang pagsaka sa non-index crimes sa syudad dili mahimong isalikway lang, gihatagan sa kapolisan sa syudad ang mga sakop niini og tumbo nga mga lugar aron ilang bantayan. 

Tungod usab niini, gilusab ang Oplan Sita, diin ang mga kapolisan maghimog kalit nga mga checkpoints aron sitahon ang mga motorista sa ilang mga lisensya, rehistro ug sa ilang kondisyon sa pagmaneho. 

Gikataho na sa mga tigum nga daghang mga motorista ang walay gihuptang mga lisensya, mga bata nga dili pa kalisensyahan ug mga sakyanan nga walay rehistro o may expired na nga papeles. 

Aron matikop ang mga lugar sa syudad, matag pulis, may kaugalingon nga giangkon nga lugar bantayanan. 

Kon adunay mahitabo sulod sa ilang mga naangkon nga lugar ug wala sila sa pagkahitabo, may kinahanglan silang ikapasabut sa hepe, palubad ni Degay atul sa City Peace and Order Council Meeting. 

Apil sa mga kalampusan sa syudad sa Oplan Sita sa unang gabii nilang bantay mao ang pag-impound sa 9 ka motorsiklo ug pagtunol sa 36 ka citation tickets, taho sa hepe nagdto sa atubangan sa konseho. 

Ang mga kasagarang violations nga madakop sa Oplan Sita nga magpa-impound sa sakyanan ilabi na lon may Land Transportation Office deputized agents nga makuyog, mao ang pagmaneho nga walay lisensya, pagpadagan sa wa marehistro nga sakyanan, mga may dagko'g tigog nga tambotso, walay plate number ug pagmaneho nga naa sa impluwensya sa ilimnong makahubog. 

May mga nasakpan usab nga wala magtuman sa lokal nga balaod sa trapiko sama sa pagcounter-flor, parking sa mga lugar nga dili parkinganan, pagsulod sa mga one way streets ug pagpadagan sa sobra ka kusog. 

Hinuon, namatikdan na usab nga mas daghan nag oras ang kapolisan nga magbantay ug igkita sa kadalanan lon itandi kaniadto. 

Kini usab samtang gipapun-an na sa kapolisan ang katas-on sa ilang oras sa duty, ug gawas pa, gipaundang na ang sistema nga may 24 oras nga duty. 

Matud ni Bohol Police Chief PSSupt Angeles GeƱorga, imposibleng dili ma-apektohan ang performance ug ang kaabtik sa usa ka pulis kon dili na matulog sa 24 oras. (rahc/PIA-7/Bohol)
Sa paghimong luwas sa mga kadalanan sa Tagbilaran, giladlad sa syudad ang kapolisan sa mga tumbok nga lugar aron ilang bantayan. Gawas pa, himoon ang kinalit nga mga checkpoints aron kapugngan ang pagmaneho sa mga motoristang way lisensya ug nag maneho sa mga sakyanang way rehistro ug expired na ang mga papeles, pasabut ni PSupt Patricio Degay. (rahc/PIA-7/Bohol)

No comments: