Pasalig sa Palasyo: Madayon ang 

Brgy. ug SK elections sa Mayo 

MANILA, Pebrero 27 (PIA)--Giseguro sa Malakanyang nga madayon gayud ang piniliay sa barangay ug Sangguniang Kabataan (SK) sa buwan sa Mayo. 

Sumala pa ni Presidential Spokesman Harry Roque, mismong si Senate President Koko Pimentel ang miingon nga bugnaw sila sa Senado sa plano sa Kamara nga i-oktaba nasad og balik ang eleksyon. 

Si Roque nagkanayon nga natingala sila kun asa nakuha ni Senate Minority Leader Franklin Drilon ang ideya sa pahayag nga dili madayon ang barangay ug SK elections sa Mayo aron giingong mahatagan og dalan ang Charter-change nga klaro man ang baroganan sa Senado sa maong isyu. 

Sa Kamara, migawas usab ang maong isyu sa dihang niduso og balaodnon si Oriental Mindoro Rep. Reynaldo Umali alang sa postponement sa Barangay ug SK eleksyon. 

Kahinumdoman nga pila ka higayon gi-oktaba ang piniliay sa Barangay ug SK eleksyon tungod sa kahadlok ni Presidente Rodrigo Duterte nga mobaha ang salapi gikan sa ilegal nga droga ug mabutang sa pwesto ang mga kandidatong pondohan sa mga drug lord. 

Samtang padayon ang pagpangandam nga ginahimo sa Department of Interior and Local Government (DILG) alang sa barangay elections sa Mayo. 

Sigun pa ni DILG Undersecretary Martin Diño, nakig-alayon na sila sa Commission on Elections (COMELEC) aron masiguro ang hapsay ug malinawon nga eleksyon karong Mayo. 

Gidugang pa ni Diño nga gisugdan na usab nila ang kampanya batok sa mga abusado, mapahimoslanon ug mga adik o drug lord nga opisyal sa barangay. 

Giingong kun i-base sa listahan ni Presidente Duterte, naa sa siyam ka libo (9,000) ka barangay officials ang nalambigit sa ilegal nga droga. (ecb/PIA7-Bohol) 

===============

Papal Nuncio, gibisita ang mga simbahan sa 

Bohol nga nagpadayon ang reconstruction 

TAGBILARAN CITY, Pebrero 27 (PIA)--Gibisita kagahapon ni Papal Nuncio to the Philippines, Archbishop Gabriele Giordano Caccia ang mga simbahan sa Bohol nga nagpadayon pa ang reconstruction. 

Gibisita niini ang Holy Trinity Church sa lungsod sa Loay ug Santa Cruz Parish Church sa lungsod sa Maribujoc. 

Wala kalikaying mangangha ang Papal Nuncio sa gipakitang pagtinabangay sa tanan aron mabalik ang porma ug kapiskay sa mga gi-ampingang simbahan sa lalawigan. 

Sa iyang homiliya sa gipahigayon niining misa kagahapon sa hapon sa Saint Joseph Cathedral, gitumbok niini ang pagbag-o sa kaugalingon sa mga tawo isip usa ka Kristiyano. 

Gisusama niini ang kinabuhi sa tawo sa mga simbahan sa Bohol diin may mga higayon nga maguba kini apan gipaningkamotan nga matukod og balik. 

Karong adlawa, personal nga gipangunahan sa Papal Nuncio ang inagurasyon ug pagtugyan sa Immaculate Conception Parish Church sa lungsod sa Baclayon ngadto sa Diocese sa Tagbilaran human gilagdaan ang certificate of completion sa National Historical Commission of the Philippines (NHCP). 

Ang maong simbahan apil sa mga century old churches sa Bohol nga nahugno sa linog niadtong Oktubre tuig 2013. (ecb/PIA7-Bohol) 

Si Papal Nuncio to the Philippines, Archbishop Gabriele Giordano Caccia atol sa liturgical reception 

sa St. Joseph Cathedral niadtong Febrero 26, 2018. (ecb/PIA7-Bohol)