Thursday, February 01, 2018

Pulis did-an sa pagpanugal, 
bisan pa sa legal nga paagi

TAGBILARAN CITY, January 31 (PIA)--Isip mga sumbanan sa maayong buhat, gipahinumdom sa bag-ong hepe sa kapolisan sa Bohol ngadto sa iyang mga kaubanan sa pwersa nga magbalantay sa kalinaw ug kahapsay sa pagyam-id sa pagpanugal. 

Kini usab samtang mikabat sa 341 ka tawo ang nasikop sa mga kapolisan sa Bohol niadtong 2017 tungod sa ilegal nga sugal. 

Gisaysay ni Police Senior Superintendent Angeles Geñorga nga dili niya buot nga may pulis nga makit-an nga naa sa sugalan, ug gidid-an usab niya ang kapolisan sa pagpanugal, bisan pa sa legal nga mga sugalan. 

Kini usab dungan sa gikataho nga may mga pangpublikong opisyales ang nasakpan nga nanugal didto sa usa ka casino. 

Sa Bohol, nahipos usab sa kapolisan gikan sa mga nagsugal ang kwarta nga pusta isip edidensya nga mokabat sa P62, 383.50, samtang napasang-at sa mga tinugyanan ang 183 ka kaso sa tukmang mga korte. 

Hinuon, kadtong mga nakab-ot nga mga kalampusan sa kampanya sa ilegal nga sugal, nakab-ot sa dili pa si Geñorga ang hepe sa kapolisan sa Bohol. 

Misaka sa posisyon isip hepe sa kapolisan sa Bohol isip puli ni PSSupt Felipe Natividad, si Geñorga kinsa usa ka Bikolano, may gihuptang hataas nga kasinati-an sa Criminal Investigation and Detection. 

Tungod niini, giisip na nga siya adunay daku nga mahimo batok sa ilegal nga sugal, ilabi na gayud niadtong giapilan sa mga sakop sa kapolisan. 

Didto sa Provincial Peace and Order Council Meeting, gipahinumdom sa bag-ong hepe sa kapolisan sa Bohol nga iya nga ipatuman ang palisiya nga walay pulis nga hingkit-an nga manugal o moapil sa pagpanugal. 

Gitumbok usab sa hepe nga ang presensya sa pulis sa usa ka lugar nga sugalan, igo na alang kaniya nga pruweba nga imbestigahan na ang tinugyanan sa balaod. 

Gidugang usab ni Geñorga ang pagpugong sa kapolisan sa pagpanugal, maglakip na bisan pa niadtong sugal nga legal, ug ilabi na sa ilegal. 

Niini, bisan kon ang usa ka pulis motaya sa legal nga outlet sa Lotto, mahimo na kining makalapas sa gipahinumdon ni Geñorga nagdto sa iyang gihuptang pwersa. 

Hinuon, ang pagsugod sa mga kapolisan sa pagpanugal, kasagaran molungtan na nagdto sa pagpangurakot alang sa puhunan, ug mahimo pang maghikaw sa iyang banay sa suporta nga pinansyal nga dili na ikahatag kay napusta na. (rahc/PIA-7/Bohol)
Kinahanglang wala nay pulis nga hingkit-an nga naa sa mga sugalan, buwangan, tukisan, mamusta man o dili. Kinahangalan usab nga wala nay pulis nga makit-an nga manugal, bisan pa sa legal nga mga sugalan, pahinumdon ni PSSupt Angeles Geñorga didto sa PPOC. (rahc/PIA-7/Bohol)

No comments: