Friday, March 23, 2018

Bag-ong Clarin Bridge Loay
kaagi-an na sa Sept 2019 

CEBU CITY, March 19, (PIA)—Napulo ug walo ka buwan gikan karon, may bag-o na nga iconic nga tulay ang mag-alagad sa traffic tabok sa suba sa Loay, Bohol. 

Gawas nga ang bag-ong tulay maghimong mas luwas na ug mas ekonomikanhong pagpa-agi sa katawhan, mga sakyanan ug mga serbisyo, ang bag-ong tulay nga hinganlan gihapon og Clarin Bridge makadugang sa industriya sa turismo sa lalawigan sa Bohol ug sa Central Visayas, saysay sa DPWH. 

Kini samtang ning bag-o lamang, gisugdan na og kubkob ang pundasyon alang sa tulay nga gidisenyo nga makalahutay sa kalamidad ug sa kabug-aton sa trapiko nga mas mopadaghan pa sa pagbukas unya sa Panglao Airport. 

Gipangunahan ni Department of Public Works and Highways (DPWH) Secretary Mark A. Villar uban sa Bol-anon nga Cabinet Secretary Leoncio B. Evasco Jr. ug Kongresista Arthur Yap ang pag-groundbreak sa bag-o unya nga tulay niadtong Biyernes, Marso 16, 2018. 

Ang bag-o unya nga tulay nga mas lapad pa kay sa kasamtangang Clarin Bridge, maoy ipuli sa tulay karon nga naapektohan sa linug niadtong Oktubre 2013. 

Human sa linog nga miigo usab og nakadaut sa daghanan pang imprastraktura ug mga tulay sa Bohol ug sa Sentrong Kabisay-an, gitaghuwatan sa DPWH og ayum-ayum ang tulay aron lamang maka-alagad pa sa pagpadagan ug pagpadangat sa mga hinabang ug relief. 

Apan sanglit dili gayud kini makalahutay sa nagkadaghan nga bul-og sa trapoko sa habagatang bahin sa Bohol, usa ka ga-arko nga tulay ang gidesenyo ug tukoron pipila ka metros tupad usab sa tulay karon. 

Ang bag-ong tulay, segun pa sa DPWH, may gitas-on nga 104 lineal meters nga kansang mga babag, magdagway og letra nga W nga maoy sagad nga dagway sa neilsen arch bridge. 

Dugang sa ahensya sa obras publikas, ang bag-ong tulay nga ipabarug, kabahin pa sa Bohol Circumferential Road Contract Package 3 nga gipatuman ilawom sa DPWH Road Upgrading ug Preservation Projects. 

Ang proyekto nga nag nagkantidad og P445.772 milyones, natahan na human sa bidding ngadto sa Vicente T. Lao Construction nga nakigtambayayong sa Indonesian nga kompanyang PT Wijaya Karya. 

Ang proyekto maglangkub usab sa construction sa bridge approaches sa kinatibuk-ang 425 lineal meters, may duha ka lanes, ug kini dumalahon sa DPWH Unified Project Management Office-Roads Management Cluster 1. 
Matud pa ni DPWH Project Director Virgilio C. Castillo, magsugod dayon ang actual civil works samtang ang ontrata molanat nagdto sa Septembre 2019 o kinatibuk-ang 18 months or by September 2019. 

Kini gipundohan pinaagi sa kasabutan sa loan tali sa Kagamhanan sa Pilipinas ug sa Kagamhanan sa nasud nga Hapon pinaagi sa Japan International Cooperation Agency (JICA). 

Uban usab sa mga nitambong sa groundbreaking ceremony sila DPWH Undersecretary Emil K. Sadain, Japan International Cooperation Agency (JICA) representative Keisuki Fukui, Embassy of Indonesia to the Philippines representative Ibu Budi Dewayante, Bohol Provincial Administrator Alfonso Damalerio II, Loay Mayor Rochelle Brigitte Lim Imboy, Special Envoy to China Fernando Selim Borja uban ni Cebu City Mayor Tomas Osmeña, DPWH Region 7 Director Ador Canlas, ug Bohol 1st District Engineer Francis Antonio Flores. (DPWH/PIA)

No comments: