Duha ka kalihukan sa bisekleta 

sa week-end ning semanaha

TAGBILARAN CITY, March 12 (PIA)--Duha ka sunod nga mga kalihukan sa pagbisekleta ang mahimong apila sa mga may tumong alang sa maayong lifestyle ug buot sukdon ang ilang katakus ug lahutay, karong Sabado ug Domingo.

Agi og pagduyog sa kasumaran sa 4th Infantry (Katapatan) Battalion ug agi og pagpakita nga mas pili-on sa mga Bol-anon ang kalinaw, nagpabiling bukas ang pag-apil sa mga mahilig sa bisekleta sa 110 kilometros nga Sikad alang sa Kalinaw karong Sabado sa kaadlawon, Marso 17. 

Sa labing katapusang ihap, dul-an na sa 80 ka magbisekleta ang miparehistro pinaagi ni Grace Polestico (Ecarg Slop) sa facebook samtang may mga nagpalista usab nga miderecho na sa kampo. 

May sakyanan nga itanyag sa army nga magkuha sa mga bisekleta gikan sa Plaza sa Tagbilaran sa Sabado sa alas 2:30 sa kaadlawon, ug gipaabut nga maghatud usab sa mga moapil balik sa syudad inig human sa kalihukan. 

Ang pagbyahe magsugod sa kampo sa 47th IB sa Macaas Tubigon sa alas 5:00 sa sayong buntag og morumbo sa Tagbilaran subay sa Tubigon, Calape, Loon, Maribojoc ug Cortes subay sa dalan sa daplin sa dagat o coastal road. 

Inig abut sa Tagbilaran, adto sa Plaza Rizal, may hamubo nga programa ug gaan nga pamahaw. 

Human niana, may mga mahilig sa bisekleta nga nakapalista na sa Antequera Offroad Duathlon ang mangandam na usab sa paduwa sa Antequera agi ug pagduyog sa ilang ika 142 nga kasumaran sa katukoran sa lungsod. 

Matud ni Bise mayor Simon Jadulco, may duha na lamang ka slots ang nahibilin alang sa lumba nga magsugod sa sayong buntag sa Domingo, Marso 18. 

Hinuon, alang sa Duathlon diin himoon ang 5 kilometros nga lumba sa dagan, 25 kilometros nga lumba sa bisekleta ug 3 ka kilometros nga dagan, kinahanglang icheck in na ang bisekleta sa pagka Sabado o sa Domingo sa kaadlawon. 

Adunay libre nga sakyanan sa mga bisekleta nga mokarga sa mga mangapil gikan sa Plaza sa Tagbilaran sa Sabado sa alas 3:00 sa palis 

Ang lumba sa Antequera mahimong apila sa babaye, lalaki, ug relay sa bisan unsang kombinasyon. 

Buhi-an ang lumba sa alas 6:30 sa buntag sa Domingo ug ang cut-off time sa may ala 1:00 sa palis. 

Kadtong dili na makaabut sa cut-off time, mahimo gihapon nga modawat sa finishers certificates. 

Alang sa dugang kasayuran, imessage ang Antequera Offroad Duathlon sa facebook. (rahc/PIA-7/Bohol)

Road bikes ang kasagarang sakyan sa mga moapil sa Sabado nga SIkad alang sa Kalinaw samtang mountainbike ang gamiton sa Domingo sa Antequera Offroad Duathlon: duha ka kalihukan sa pagbisekleta ning umaabut nga weekend. (rahc/PIA-7/Bohol)