Hi-tech nga anti-disaster 

warning device, gilusad sa PCOO 

TAGBILARAN CITY, March 12 (PIA)--Gilusad ning bag-o lang sa Presidential Communications Operations Office (PCOO), PTV ug NEC didto sa syudad sa Davao, isip pilot city ang labing unang Early Warning Broadcast System (EWBS) ug Datacasting System sa tibuok Pilipinas. 

Tungod niini, magbaton na ang publiko og kasaligan nga broadcast system nga direktang maghatag og impormasyon ug mogiya sa mga nanan-aw ug naminaw sa mga kalamidad, katalagman ug emergency situation sa ilang lugar. 

Sigun pa ni PCOO Kalihim Martin Andanar, pinaagi sa Digital Terrestrial Service, masulayan na ang EWBS nga usa ka remote activation system alang sa radyo ug telebisyon. 

Gipasabot sa Kalihim nga kini usa ka broadcast warning system sa dili pa mahitabo ang usa ka kalamidad pinaagi sa pag-visualize sa epekto sa predictable natural calamity ug emergency situation. 

Pinaagi niini, mahatagan og kahigayonan nga makapangandam, mobakwit kun gikinahanglan ug uban pang safety measures ang usa ka apektadong komunidad. 

Gidugang usab ni Andanar nga pinaagi sa digital terrestrial service, mapaabot ngadto sa publiko gamit sa EWBS ug data-casting features ang gidak-on sa peligro sa nagsingabot nga kalamidad. 

Samtang ang datacasting usa ka system updates sa pagbanabana sa panahon, lihok sa bagyo, baha, landslides ug kahimtang sa mga kadalanan. (ecb/PIA7-Bohol) 

==============

Pagpasuot og helmet, gibalik na usab og 

implementar sa kapolisan sa syudad sa Tagbilaran 

TAGBILARAN CITY, March 12 (PIA)--Gibalik na usab sa kapolisan ang pagpasuot og helmet sa tanang magsakay og motorsiklo sa syudad sa Tagbilaran. 

Si Tagbilaran City chief of police, Supt. Patricio Degay Jr., nipahibalo nga ang estriktong implementasyon sa helmet law gibalik na usab sugod niadtong Biyernes, Marso 9. 

Gipahinumdoman ni Degay ang mga magsakay og motorsiklo sa pagsiguro nga ang ilang mga helmets adunay Import Commodity Clearance(ICC) stickers o PS marks. 

Ang mga madakpan nga dili magsuot og helmet (ang driver ug backrider) pahamtangan og multa. 

Gitataw usab sa city chief of police nga agi og pagsunod usab sa lokal nga ordinansa, ang mga magsakay og motor gidid-an sa paggamit og taptap o bisan unsang materyal nga makatabon sa nawong o pagsuot og mga tinted nga helmets kun kini full-face. 

Ang Republic Act 10054 o ang “Motorcycle Helmet Act of 2009” gipatuman niadtong tuig 2010 apan gisugat kini og mga pagsupak sa publiko, ilabi na sa isyu kalabot sa pagsaka sa presyo sa mga helmets ug pagdagsang sa mga mini nga ICC stickers. 

Nakalatid sa Section 7 sa RA 10054 ang mga prescribed penalties o silot diin ang kinsa mang masakpan nga dili magsuot sa standard protective motorcycle helmet pahamtangan og P1,500.00 nga multa alang sa unang paglapas; P3,000 sa ikaduhang higayon nga paglapas; P5,000 sa ikatulong paglapas; ug P10,000 ug pagkumpiska sa driver’s license alang sa ika-upat nga paglapas. 

Niadtong tuig 2014, ang 12th Sangguniang Panglungsod nipalabang og ordinansa nga nagdili sa mga motorista sa pagsuot og bisan unsang materyal nga matabonan ang nawong sama sa bonnets, t-shirts, panapton ug bisan full-face helmets ug ubang helmets nga may itom nga tinted visors samtang anaa sa mga pampublikong lugar sa syudad sa Tagbilaran. 

Ang maong ordinansa naghatag og gahom sa city police team ug city traffic aides sa pagpahunong sa mga motorista nga nagsul-ob niining materyal nga nakatabon sa ilang kailhanan. 

Ubos sa maong ordinansa, ang mga violators gi-require sa pag-presentar sa ilang proper identification documents. 

Ang City Traffic Management Office ug ang City Police Station ang gitahasan isip lead agencies alang sa epektibong pag-implementar niining ordinansa ug sa pag-mintinar og database alang sa reference ug monitoring nga katuyoan. (ecb/PIA7-Bohol)