Kontrata pagsugod sa FS sa Visayas

Inter-Island Bridges, pirmahanan na 

CEBU CITY, March 19 (PIA)—Hinay hinay nang nagpanghitabo ang ambisyoso nga mga tulay nga magdugtong sa Bohol ngadto sa Sugbo ug sa Negros ngadto sa Sugbo samatang lihokonon pa ang tulay nga magdugtong sa Leyte paingon sa Bohol. 

Segun sa labing bag-o nga kasayuran nga nakaykay gikan sa labing bag-o nga Regional Development Council sa ilang Full Council Meeting niadtong Huwebes, Marso 15, 2018 didto sa Montebello Hotel sa Lahug, nabutyag nga pirmahanan na ang kontrata sa pagsugod sa feasibility study (FS) sa duha ka mga dagkong tulay nga magsumpay sa tulo ka mga dagkong isla dinhi sa Central Visayas. 

Naka-empake sa proyekto nga nailhan nga Visayas inter-Island Bridges, ang duha sa tulo ka mga proyekto nga nalakip niini, ang andam na nga sugdan ang pagtuon kon hain mang dapita ang tulay tukoron ug kon maka-sapal ba kini sa gastohon unya sa kagamhanan kon timbangon ang iyang ekonomikanhong gamit. 

Segun pa sa RDC, hinog na alang sa contract signing ang pagsugod sa FS, ug kini may pundo na. 

Subay sa kasayuran didto sa RDC, ang Asian Development Bank (ADB) Infrastructure Development Program mao ang kuhaan sa pahuwam. 

Ang pundo alang sa Project Preparatory Technical Assistance (PPTA) magtabang sa mga proponents sa paghulma sa usa ka taho sa detalyado nga pagtuon agi og suporta nga dokumento alang sa pagpapundo sa proyekto. 

Sa FS, tun-an ang mga lakang nga himoon aron katun-an ang epekyto niini sa kalikopan, katilingbanong epekto ug ang possible nga pagpamalhin sa mga komunidad nga maligsan sa proyekto. 

Sa FS usab mahibaw-an ang mga tukmang pamaagi sa pagbayad, pagpundo ug lakip na ang pagtumbok sa mga pamaagi sa pag-ugmad sa pagdumala ug sa kasayon sa pagpabarug unya sa imprastraktura. 

Ang resulta sa giamdam nga preparatory Technical Assistance maoy mopaluyo sa taho ug recomendasyon ngadto na sa Presidente aron mahibaw-an na ang matang sa panhuwam nga himoon pagpundo sa proyekto. 

Kini ang himoonon alang sa Cebu-Bohol Link Bridge nga giingong magtamak sa mga mabaw nga bahin sa Lapu-Lapu paingon sa Getafe, Bohol. 

Apil na usab sa lagdaan aron kasugdan na ang FS mao ang Negros-Cebu Link Bridge, nga giingong magsumpay sa Sibulan Negros paingon sa Santander sa Sugbo. 

Sa laing bahin, ang Japan Infrastructure Development Institute mao nay naglantaw nga mopundo alang sa kinatibuk-ang FS sa Bohol-Leyte Link Bridge. 

Kahinumduman nga ang tulo ka dagkong proyekto dinhi sa Central Visayas nahilakip na sa 75 ka Flagship Projects sa kagamhanan sa Pilipinas nga nagtumong nga palig-onon ang connectivity ug mobility sa Central Visayas ug gani lakip na sa Eastern Visayas. (rahc/PIA-7/Bohol)