Thursday, March 15, 2018

Libreng tuition sa kolehiyo, 
ipatuman na sa Hunyo 

TAGBILARAN CITY, March 15 (PIA)--Ipatuman na karong Hunyo ang libreng tuition fee ug miscellaneous fee alang sa mga estudyante sa mga state universities and colleges (SUCs) ug Commission on Higher Education (CHED)-recognized local universities and colleges alang sa academic year 2018-2019. 

Kini human gipagawas sa CHED ang implementing rules and regulations (IRR) alang sa Universal Access to Quality Tertiary Education Act of 2017. 

Agosto sa niaging tuig sa dihang gilagdaan ni Presidente Rodrigo Duterte ang balaodnon kalabot sa libreng tuition sa SUCs. 

Sigun pa ni CHED Office-in-charge Prospero De Vera, gitakda na silang molibot sa tibuok Pilipinas aron ipasabot ang IRR. 

“Sa ngayon, covered na sila nung P8-billion free tuition so sa June ang madadagdag sa marami ay yung libreng miscellaneous fees," pasabot pa ni De Vera. 

Aron mahimong kwalipikado sa libreng tuition ug miscellaneous fee, angay nga makapasar ang estudyante sa admission ug retention requirement sa eskwelahan, wala pa’y undergraduate degree ug dili overstaying sa kolehiyo. 

Gibutyag usab ni De Vera nga walay income requirement nga kinahanglan aron mahimong kwalipikado sa libreng tuition. 

Matud pa nga ang ipatuman karon nga pilosopiya sa administrasyong Duterte mao ang libreng edukasyon alang sa tanan. 

Giingong ang income requirement mosulod lamang alang sa mga manginahanglan og dugang tabang gikan sa gobyerno. 

Nahisulod usab sa balaod ang mga estudyante sa mga Technical-Vocational Institutions. (ecb/PIA7-Bohol) 

================
Mga estudyante, mo-trabaho 
bugti sa libreng tuition sa kolehiyo 

TAGBILARAN CITY, March 15 (PIA)--Pa-trabahuon sa Commission on Higher Education (CHED) ang mga estudyanteng makadawat sa libreng tuition sa kolehiyo. 

Kini human gipagawas sa ahensiya kagahapon ang mga sumbanan sa mga kwalipikadong estudyante nga makadawat og benepisyo sa gi-apubahang Universal Access to Quality Tertiary Education Act of 2017. 

Sigun pa ni CHED Officer in charge Prospero De Vera, isip recipient sa mga taxpayers, responsibilidad sa mga mahimong eskolar nga ibalik sa komunidad ang madawat nga benepisyo. 

“They are now being paid for by taxpayers’ money and it is their responsibility to give back to their community or give back to the nation,” matud pa ni De Vera. 

Apan giseguro sa opisyal nga dili bug-at ang trabahong ihatag sa mga estudyante aron dili kini maka-apekto sa ilang academic requirements. 

Mga trabaho sama lamang sa library assistance ug depende ra usab sa mga unibersidad kun unsang trabaho ang ihatag nila sa mga estudyante. 

P40 bilyon ang gigahin sa gobyerno alang sa libreng tuition fee sa mga estudyante sa kolehiyo sa mga State Colleges and Universities ug CHED-recognized local universities and colleges alang sa academic year 2018-2019. 

Ubos niining balaod, libre na ang tuition fee ug miscellaneous fees sa mga estudyante nga makapasar sa admission ug retention policy sa unibersidad, wala pa’y undergraduate degree ug dili overstaying sa kolehiyo. (ecb/PIA7-Bohol) 

===============
May dugang P1K sa uniform allowance 
sa mga kawani sa gobyerno karong tuig 

TAGBILARAN CITY, March 15 (PIA)--Ang Duterte administration nipahibalo kagahapon sa dugang P1,000 sa Uniform/Clothing Allowance (U/CA) sa mga kawani sa gobyerno sugod karong tuig. 

Sa gipahigayong press conference kagahapon didto sa kaulohan, gibutyag ni Department of Budget and Management (DBM) Kalihim Benjamin Diokno nga gi-umentohan na ngadto sa P 6,000 gikan sa P 5,000 sa niaging tuig ang U/CA sa mga kawani sa gobyerno. 

Nakalatid kini sa gipagawas nga Budget Circular No. 2018-1 sa DBM nga gilagdaan niadtong Marso 8, 2018. 

Naa sa halos P1.12 bilyon ang gigahing pondo sa gobyerno alang sa umento sa U/CA. 

Gitahasan sa DBM ang nagkadaiyang mga ahensiya sa gobyerno sa pagmugna sa ilang kaugalingong ‘internal guidelines’ alang sa paghatag sa U/CA. (ecb/PIA7-Bohol)

No comments: