Tuesday, March 13, 2018

Mga opisyal sa brgy. nga walay gihimo kontra 
ilegal nga droga, pasakaan og kaso sa PNP 

MANILA, March 13 (PIA)--Gipasidan-an ni Philippine National Police (PNP) Chief Ronald ‘Bato’ Dela Rosa ang mga opisyal sa barangay nga wala nakighiusa sa Barangay Anti-Drug Abuse Councils (BADAC). 

Matud pa ni Dela Rosa, tataw nga pagpasagad kini sa ilang trabaho ug gipasidan-an niini ang mga Barangay Chairmen ug bisan ang mga kagawad nga maihap na lang ang ilang mga adlaw. 

Kini tungod kay magpahigayon na ang PNP og case build up ug sa higayong mapamatud-an nga wala sila’y BADAC master plan, mag-atubang sila og kaso. 

Giingong gawas sa lakip kini sa budget sa mga barangay, nakalatid usab ubos sa balaod nga angay nga aktibo ang BADAC sa paghimo og mga programa aron batokan ang ilegal nga droga. 

Alang kang Dela Rosa, duha lang ang implikasyon sa mga baranggay nga walay BADAC – kini tungod kay basin nahadlok ang mga opisyal nga batokan ang mga sindikato o di kaha sila mismo ang tig-suporta sa mga sindikato sa droga sa ilang lugar. 

Nadiskubre nga sa 42,000 nga barangay sa tibuok nasod, naa sa 30 porsiyento ang walay BADAC. 

Klaro nga paglapas kini tungod kay ang pagtukod og BADAC dugay nang gimando sa Department of the Interior and Local Government (DILG) pinaagi sa MC No. 2015-063 ug subling gipahinumdom sa Dangerous Drugs Board (DDB) Regulation No. 3 Series of 2017, o “Strengthening the Implementation of the Barangay Drug-Clearing Program” alang sa paglimpyo sa mga barangay batok sa ilegal nga droga. 

Apil usab sa trabaho niini ang makig-tinabangay sa mga operasyon sa droga sa mga otoridad lakip na ang pagsumite og drugs watch list. (ecb/PIA7-Bohol) 

===============
Nominasyon alang sa 
SUHID 2018, gibuksan na 

TAGBILARAN CITY, March 13 (PIA)--Gibuksan na sa Kagamhanang Probinsiyal sa Bohol pinaagi sa Office of the Provincial Agriculturist (OPA) ang pagpangdawat og nominasyon gikan sa mga kalungsoran ning lalawigan alang sa nagkalain-laing kategoriya sa “SUHID sa Malampusong Mag-uumang Bol-anon Search 2018.” 

Sigun pa ni Assistant Provincial Agriculturist ug SUHID co-chairperson sa Technical Working Group (TWG) Larry Pamugas, nagpadala na sila og mga sulat lakip na sa listahan sa nagkalain-laing kategoriya ug mga ganti sa mga mayor ug municipal agriculturists sa lalawigan nga nagdapit kanila sa pag-sumiter sa ilang mga nominasyon sa dili pa ang Mayo 30, 2018. 

Ang nagkalain-laing kategoriya ug mga ganti nga madawat sa SUHID 2018 mao ang mosunod: Outstanding Young Farmer – P5,000; Outstanding Young Fisherfolk – P5,000; Outstanding Young Farmer Association – P15,000; Rice Farmer (Adopting Integrated Farming) – P10,000; Corn Farmer (Adopting Integrated Farming) – P10,000; Organic Agriculture Practitioner Farmer – P10,000; Fisherfolk (Freshwater Fishponds) – P10,000; Fisherfolk Association – P15,000; Farm Family – P10,000. 

Municipal Agriculture and Fishery Council (MAFC) – P15,000; Farmer’s Association – P15,000; Rural Improvement Club (RIC) – P15,000; Most Outstanding Rice-Duck Farmer – P10,000; Municipal Agriculturist/Agriculture Officer – P5,000; Rice Technician – P5,000; Corn Technician – P5,000; HVCDP Technician – P5,000. 

High Value Commercial Crop Farmer (Fruit) – P10,000; Fishery Technician – P5,000; High Value Commercial Crop Farmer (Vegetable) – P10,000; Most Outstanding Japonica Rice Farmer – P10,000; Outstanding Hybrid Rice Farmer – P10,000; Outstanding Organic Agriculture Farmers Group – P15,000; Outstanding Fisherman-Fish Capture – P5,000; Outstanding Cassava Farmer – P5,000; Outstanding Banana Farmer – P5,000; Outstanding Agri-enterprise for Fishery – P15,000; Outstanding Ka-ABAG – P5,000; ug Outstanding Agri-enterprise for Crops – P15,000. 

Gitakda sa buwan sa Hulyo atol sa Sandugo Agri-Fair Program ang paghatag og ganti sa mga mananaog. 

Ang SUHID sa Malampusong Mag-uumang Bol-anon tinuig nga kalihokan sa lalawigan nga nagtinguha sa pag-ila sa mga bantogang mag-uuma, mangingisda, agri-enterprise, livestock raisers, agri-based organizations ug farmers cooperatives sa Bohol. (ecb/PIA7-Bohol) 

No comments: