Monday, March 05, 2018

Nationwide Information Network System,
itukod sa gobyerno batok fake news

MANILA, March 05 (PIA)--Plano sa gobyerno nga magtukod og usa ka information satellite network sa tibuok nasod. 

Sigun pa ni Presidential Communications Operations Office (PCOO) Kalihim Martin Andanar, tuyo niining proyekto nga batokan ang ‘disinformation’ ug ‘misinformation’ o pagkatap sa mga pekeng balita o ‘fake news’. 

Matud pa ni Andanar nga pinaagi sa maong satellite network, malikayan ang pagkatap sa mga pekeng balita tungod kay sakop niini ang 42,000 ka baranggay ug tanang information officers sa tibuok nasod aron matabonan ang mga balitang dili tinuod. 

Gibutyag pa sa Kalihim nga kini ang himuong ‘central hub of information’ sa matag baranggay ug hatagan og receiver aron tanang opisyal direktang makadawat sa impormasyon gikan sa gobyerno. 

Pangunahan kining proyekto sa PCOO kauban ang mga buhatan sa Presidente ug ang National Security Adviser. 

Ang maong programa planong ipatuman sa buwan sa Hunyo. (ecb/PIA7-Bohol) 

==============
Mga opisyal sa brgy. nga walay gihimo sa kampanya 
batok sa ilegal nga droga, pasakaan og kaso sa DILG
MANILA, March 05 (PIA)--Gipasidan-an sa Philippine Drug Enforcement Agency (PDEA) nga pasakaan og kaso ang bisan kinsang opisyal sa barangay nga dili motabang sa kampanya batok sa ilegal nga droga. 

Sigun pa ni PDEA Director General Aaron Aquino, hatagan lamang nila og 30 ka adlaw ang kinsa mang opisyal sa barangay nga dili mosunod sa gimugnang Barangay Anti-Drug Abuse Councils (BADACs) sa PDEA ug Department of the Interior and Local Government (DILG). 

Nagpadala na og sulat ang DILG sa mga badlongon nga opisyal sa barangay nga nagpabiling walay gihimo ug gitulogan lamang ang giyera batok sa ilegal nga droga sa gobyerno. 

“Ang BADAC mohatag og tabang ngadto sa mga ahensiya nga tigpatuman sa balaod sa pagpapha ug clearing operation sa ilegal nga droga. Gitahasan sila sa pag-plano ug pag-implementar og estratehikong palisiya, programa ug proyekto kalabot sa drug prevention ug control, diin gihatagan sila og gahom political ug polis sa barangay aron modumala sa tulumanon sa komunidad,” matud pa ni Aquino. 

Nagtuo si Aquino nga kun tanang opis­yal sa barangay ma­katabang nila sa gihingosgang kampanya batok sa ilegal nga droga, moabot ang panahon nga mahimong drug free ang atong nasod. 

Giingong mahimong ikatangtang sa ilang posisyon isip mga opisyal sa barangay ang dili motabang tungod kay pasakaan kini nila og kasong ‘gross negligence ug dereliction of duties’. 

Gipahayag usab ni Aquino nga posibleng protektor o di kaha nalambigit mismo sa drug activities ang mga opisyal sa barangay nga dili motabang sa drug war campaign sa gobyerno ug mahimo kining pasakaan og kaso base sa Republic Act 9165. (ecb/PIA7-Bohol) 

==============
POEA, nipasidaan batok sa
pekeng online registration system


TAGBILARAN CITY, March 05 (PIA)--Nipasidaan ang Philippine Overseas Employment Administration (POEA) sa mga licensed recruitment agency ug medical clinic nga tigdawat og mga overseas Filipino workers (OFWs) nga dili mutuo sa mga pekeng online registration system nga giingong gidumala sa Gulf Cooperation Council (GCC) Ministry of Health. 

Sa abiso sa POEA, miingon kini nga gihimakak sa Department of Health (DOH) nga nag-aprubar kini og sumbanan nga nanginahanglang magbayad og registration fee nga US$10 ang mga aplikante alang sa ilang Pre-Employment Medical Examination. 

Gibawalan na usab sa DOH ang mga Medical Facilities for Overseas Workers and Seafarers (MFOWS) sa pag-apil o paggamit sa maong online scheme. 

Sa Department Circular No. 0371 nga gipagawas niadtong Disyembre 22, 2017, miingon ang DOH nga tungod kay nagpahamtang og dugang bayad alang sa online registration system sa mga aplikanteng OFW ug limitado lamang sa piniling DOH-accredited OFW clinic, mahimo kining magamit sa ubang matang sa monopoly sa health examination service alang sa mga Filipino migrant workers. 

Gi-abisohan na usab sa POEA ang publiko ug DOH-accredited clinics alang sa mga OFW nga i-report sa DOH ang bisan unsang aktibidad kalabot sa maong online registration system. (ecb/PIA7-Bohol)

No comments: