Pagkaltas sa sweldo sa empleyado 

nga way pinirmahang pagtugot, illegal

TAGBILARAN CITY, March 1 (PIA)--Gawas kon may pagtugot sa trabahante o empleyado, ilegal kon ang uniporme nga ipasuot sa mga trabahante, gibayran pinaagi sa pagkaltas sa suholan.

Kini maoy unod sa Labor Advisory No. 11 series of 2014 nga gipagawas sa Department of Labor and Employment (DOLE).

Kini nga naluwatang giya sa DOLE, subay usab sa prinsipyo nga walay employer nga manghilabut sa katungod sa empleyado nga mag-gasto sa iyang kinitaan.

Matud pa sa DOLE, ang mga empleyado ug trabahante dili angay pabayron sa mga company uniforms, gawas lamang kon may kasabutan sila sa management.

Dugang pa sa pagpasabut sa DOLE, nga ang mga pagkaltas sa sweldo sa trabahante aron ibayad sa uniporme, mga paghimog cash deposits agi og bayad sa mga damyos o mangawala nga butang, bayad sa personal protective equipment (PPE) sama sa hard hats, helmet, goggles o protective eyewear, gwantis, vest ug mga sweatshirts ug botas nga girequire sa trabaho, gidili sa sa balaod sanglit kini tulubagon man sa employer.

Hinuon, alang sa mga pribadong security agencies, giisip na nga reasonable industry standards ang pagpabayad dala sa kahimtang sa serbisyo

Gawas pa, aron mahimong legal ang pagkaltas, kini mahimo lamang kon tataw nga responsable ang empleyado sa pagkawala o pagkadaut sa butang.

Mahimo usab kon mahatagan usab og kahigayunan ang empleyado nga makapadayag nganong dili siya angayan paninglan sa kadaut, ug kon ang bili nga bayaran haum gayud sa kadaut.

Usab, legal lamang ang pagkaltas kon may mahibilin pang lapas sa 20% sa iyang senemanang kita ang empleyadong gihimuan sa salary deduction.

Gawas niana, gidili usab ang pagkaltas sa sweldo o salary deduction sa pagpundo sa empleyado sa iyang capital share o capital build-up sa mga service cooperatives, bayad sa training fees, ug uban pang pagkaltas nga wala mahilakip ning nasampit nga advisory.

Kahinumduman nga ang kagamhanan mipasabut nga ang paghatag sa mga benepisyo obligasyon sa employer ug kini isip usa ka paagi sa pagpataas sa take home pay sa mga trabahante ilabi na sa mga nag inadlaw ang sweldo. (rahc/PIA7/Bohol)