Pagpadayag batok sa coal

gidumog sa daghang tawo

TAGBILARAN CITY, March 7 (PIA)--Nag-awas ang Pre-Conference Hall sa mga Bol-anon nga misanong sa pagpakabana ug pagpadayag sa ilang posisyon supak sa gikahadlokang laraw nga magpabarug og coal-fired power plants dinhi. 

Apan gipasabut ni Acting Vice Governor Vincenzo Arcamo nga wala pay desisyon ang kagamhanang Probinsyal lakip na ang Bohol Energy Development Advisory Group (BEDAG) kon pasudlon ba o dili ang planta nga mogamit sa coal o carbon agi og sugnod. 

Nagkahiusa ang mga mipadayag sa ilang pagsupak sa coal-fired power plant nga kini hugaw, makadaut sa kalikopan ug sa kasanihan sa katawhan. 

Hinuon, segun sa datus nga gipresentar atubangan sa Sangguniang Panlalawigan kinsa nagtuki sa isyu isip usa committee as a whole, ang gipakita nga teknolohiya sa coal fire power plants mao pa kadtong karaan nga hugaw, nga nag-bugwak og aso nga makatabon sa adlaw. 

Sa yano nga pagtuki sa mga tinubdan ilabi na sa online resources, tataw nga dako na og gidagan ang pag-ugmad sa teknolohiya sa paggamit sa carbon isip sugnod, butang nga gipadayona'g tuon tungod kay ang giingon nga coal technology, usa pa gihapon sa labing barato nga sugnod aron makamugna'g dinagkong supply sa koryente.

Labing barato pa gihapon ang nuclear, sunod na ang geothermal, segun sa mga tinubdan. 

Samtang gitataw usab ni Provincial Administrator Alfonso Damalerio nga ang BEDAG wala magtutok lamang sa coal fired nga planta alang sa Bohol. 

Dugang niya, aduna nay 52 ka mga kompanya nga miduso sa ilang mga proposal agi og pagtubag sa panginahanglan sa koryente sa BOhol. 

Upat lamang ka kompanya ang misugyot sa coal samtang mas daghan ang misugyot sa solar power, apan ang solar, maglisud pa og kuha sa dinaghan nga koryente, dili sama sa ubang limpyo ug renewable nga tinubdan. 

Gipasabut usab ni Bohol Electric Cooperative I Manager Engr Dino Roxas nga isip Distribution Utility nga nikontrata lamang sa supply, wala silay mahimo kon subay sa EPIRA, may ipasulod nga koryente nga gikan sa coal-fired power plants. 

Kasamtangang 50% sa gikinahanglang koryente sa Boheco 1 ug sa Bohol Light Company Incorporated, gikan sa supply sa coal fired power plants sa Sugbo. 

Hinuon, wala pay nagpadayag sa pagbabag sa gisupply nga coal sa Sugbo, bisan pa nga gibutyag ni Obispo Albert Uy nga usa lamang ang atong kalibutan nga gipuy-an og kon dili ampingan, wala nay lain pang kapadulngan. (rahc/PIA-7/Bohol)