Pagpanglimpyo sa isla 

sa Panglao, gisugdan na 

PANGLAO, BOHOL, March 07 (PIA)--Milihok na ang lokal nga kagamhanan apil na usab ang mga residente sa isla sa Panglao ning lalawigan sa Bohol aron limpyohan ang kabaybayonan sa maong isla. 

Kini human sa gihingosgang kampanya ni Presidente Rodrigo Duterte nga limpyohan ang mga ginabisitang lugar sa mga turista sa tibuok nasod gikan sa mga iresponsableng mga tag-iya og establisyemento. 

Kadaghanan sa mga nahakot nga basura sa kabaybayonan naglakip sa mga upos sa sigarilyo, mga sudlanang plastik, styrofoams ug uban pa. 

Si Bohol Gob. Edgar Chatto nagkanayon nga igo na ang pagmahal sa mga Bol-anon aron mapa-piskay ug mapasaka ang turismo sa lalawigan nga dili na manginahanglan pa og balaod alang niini. 

Niadtong Marso 6, gipahigayon ang usa ka clean-up drive isip usa usab ka Information, Education and Communication (IEC) nga estratehiya agig pagpahinumdom sa tanan nga tinagsang papel sa matag Bol-anon ang pag-protehir sa kabaybayonan sa Bohol. 

Ning bag-o lang, nadiskubre human sa pagpahigayon og balidasyon sa Department of Environment and Natural Resources- Environmental Management Bureau (DENR-EMB) nga naa sa 400 ka establisyemento sa Panglao ug Dauis ang nakitaan og pagpanglapas sa environmental laws. (ecb/PIA7-Bohol) 

Send-off ceremony alang sa Panglao-Dauis-Tagbilaran City synchronized coastal cleanup drive nga gipahigayon sa Panglao Plaza niadtong Marso 6 nga gisalmotan sa mga provincial heads, nasudnong ahensiya sa kagamhanan, ug mga opisyal sa munisipyo ug barangay. (hulagway sa EDCom Bohol /EdChatto Bohol) 

================

Gobeyerno ug pribadong sektor, naghiusa 

alang sa malahutayong turismo sa Panglao 

TAGBILARAN CITY, March 07 (PIA)--Usa ka partnership ang gilagdaan ning bag-o lang alang sa mobilisasyon sa komunidad sa pagpanglimpyo sa kadagatan sa Panglao ug pagdapit sa aktibong kasalmotan sa aktuwal nga ‘clean up,’ apil na usab sa implementasyon ug preparasyon sa mga plano aron mosustener ang pagpanglimpyo sa Panglao sa umaabot pa nga katuigan. 

Si Gob. Edgar Chatto mipadayag sa iyang ‘full commitment’ sa pagbalanse sa kalamboan ug malahutayong agenda alang sa lalawigan sa Bohol diin iyang gipangunahan ang paglagda sa Memorandum of Agreement (MOA) alang sa Department of Environment and Natural Resources – Local Government Unit – Bohol Association of Hotels, Restaurants and Resorts – Panglao Island Chamber of Commerce and Industry (DENR-LGU-BAHRR-PICCI) “Adopt an Estero/Waterbody Program.” 

Ang ubang milagda sa maong MOA nagkalip usab nilang Dauis Mayor Miriam Sumaylo, Panglao Mayor Pedro Fuertes, Environmental Management Bureau (EMB) Regional Director (RD) William Cuñado, DENR RD Eduardo Inting, Department of Tourism (DOT-7) RD Shalimar Tamano, Rommel Gonzales alang sa BAHRR ug PICCI, ug si Board Member Ricky Masamayor. 

“We do not need laws, regulations, or even reminders if we truly love Bohol,” (Wala kita nanginahanglan og balaod, regulasyon o bisan pahinumdom kun ato gayud gimahal ang Bohol), matud pa ni Gob. Chatto atol sa gipahigayong synchronized coastal cleanup sa lungsod sa Panglao. 

Kagahapon, Marso 6, gipangunahan ni Chatto ang mga provincial heads, nasodnong ahensiya sa kagamhanan, mga opisyal sa munisipyo ug barangay sa pagpahigayon sa Panglao-Dauis-Tagbilaran City send-off alang sa synchronized coastal cleanup, ang labing una sa serye nga susamang kalihokan. 

Ang maong bahan misusi usab sa kabaybayonan sa Alona Beach human sa hamubong send-off ceremony alang sa maong clean-up drive. 

Subling gipasalig sa gobernador ang tanang suporta sa Kagamhanang Probinsiyal ngadto sa LGUs sa pag-implementar sa balaod. 

Ang maong clean-up drive usa ka Information, Education and Communication (IEC) nga estratehiya agig pagpahinumdom sa tanan nga tinagsang papel sa matag Bol-anon ang pag-protehir sa Bohol. (ecb/PIA7-Bohol) 

Ang paglagda sa MOA tali sa Department of Environment and Natural Resources, Local Government Units, Bohol Association of Hotels, Restaurants and Resorts ug Panglao Island Chamber of Commerce and Industry alang sa “Adopt an Estero/Waterbody Program” nga gipahigayon niadtong Marso 6, 2018 sa Bellevue Resort sa lungsod sa Panglao. (hulagway sa EDCom Bohol /EdChatto Bohol)