Friday, March 16, 2018


PCIC magbukas na og duha
ka Bohol extension offices

CEBU CITY, March 15 (PIA)—Sa tumong nga ikapaduol ang serbisyo sa goberno ngadto sa katawhan, buksan sa nasudnong insurance corporation alang sa panguma ang duha nila ka extension offices sa Bohol karong sunod semana.
Ang Philippine Crop Insurance Corporation (PCIC), usa ka government owned and controlled corporation kansang gimbuhaton mao ang paghatag sa panalipud pinaagi sa pagseguro sa mga tinanum sa uma, magbukas sa Lunes Marso 19, didto sa Gaviola Compound sa Ubay sa ilang Ubay extension office.
Sa pagka-ugma, lain nga pagbukas mahitabo sa Tagbilaran City Extension Office nga naa mahimutang sa BOPEL Building duol sa Kampo Dagohoy sa may alas 3:00 sa palis.
Ang PCIC magtanyag og insurance gikan sa kadaut dala sa kalamidad, sakit sa tanum og mga dangan nga moigo sa humay, mais, high value crops ug uban pang gipa-insure.
Sakop usab sa mahimong i-insure sa PCIC ang mga makinarya nga gigamit sa panguma, aron, kon magkina-unsa, may kadangpan pa gihapon ang mag-uuma bisan pa kon mabanlas ug masayang ang iyang gitanum.
Ug tungod sa lokasyon sa Pilipinas nga naduol sa agi-anan sa mga bagyo ug nasulod sa Pacific Ring of Fire, misamot ang kasibut sa kagamhanan nga tabangan ang mga mag-uuma kansang mga puhunan mahimong mapapha uban sa mga katalagman.
Isip ahensya nga tigpatuman sa insurance sa agrikultura sa kagamhanan ubos sa Presidential decree 1467 nga napabag-o sa Republic Act 8175, ang PCIC natahasan nga magtanyag sa insurance ngadto sa mga pobreng mag-uuma batok sa pagkapildi sa pananum ug kagamitan dala sa bagyo, baha, huwaw, linog, mga sakit ug uban pang hulga.
Gani, gawas pa niana, ang PCIC karon may insurance na usab alang sa mga pahuwam nga gikan sa mga lending institutions nga gigamit sa produksyon sa mga pananum nga wala pa ma-apil sa insurables sa PCIC.
Ang pagtukod sa PCIC sa extension offices sa Bohol gilantaw nga makapaaghat na sa mga Bol-anon sa pagseguro sa ilang mga umahan ug mga kabtangan.
Kahinumduman nga saunang duha ka buwan sa 2018, mikabat na sa P72 milyones ang kadaut sa panguma sa Bohol nga nasayang tungod sa epekto sa bagyong Agaton ug Basyang.
Wala hinuoy kasayuran kon kadtong mga nadaut, napailawom ba sa insurance crop insurance. (rahc/PIA-7/Bohol)

No comments: