Rehabinasyon gilusad sa Visayas, 

ICAD motanda usab sa Bohol 

TAGBILARAN CITY, March 26 (PIA)—Gilusad didto sa Sugbo niadtong Sabado, Marso 24 ang us aka kalihukan nga giduso sa Inter-Agency Committee on Anti_illegal Drugs ug sa Presidential Communications Operations Office ang kampanya ang maga-agni sa katawhan sa pagtabang aron matabangan ang mga tawong nag-hambin pa sa suliran sa illegal nga drugas. 

Gitambongan sa kapin sa 1200 ka katawhan lakip na ang mga barangay officials, mga local nga sakop sa ICAD ug mga yanong molupyo ang paglusad nga didto mahitabo sa sa Gaisanon Mactan Island Mall sa may ala una sa palis. 

Ang programa nga gipa-ila nga “Rehabinasyon’” ipalibut sa tibuok nasud aron ikapasabut sa katawhan ang mga lakang nga angay himoon aron katabangan ang labing baga sa katilingban nga una na nga miangkon nga na-ungo o migamit sa illegal nga drugas. 

Ang rehabinasyon, magtutok sa kapin sa 90% sa mga katawhang mipakitag maayong kabubut-on ug mitahan sa mga tinugyanan atul sa Oplan Tokhang apan wala na magkinahanglan pa nga ipa-ilawom sa clinical nga rehabilitasyon tungod kay dili kaayo grabe ang ilang pagkagumon sa drugas. 

Samtang gitukod pa sa kagamhanan ang mga drug rehabilitation centers sama sa Nueva Ecija ug sa Samal sa Davao, namatud-an usab nga kubos pa sa 10% sa mga mingtahan ang nanginahanglan sa drug-rehab diin may tambal gayud nga gamiton, 

Gibutyag sa Department of Health (DOH) nga kabahin sa ICAD nga halos naa sa 95% ang mga mingtahan nga nanginhanglan sa suporta sa komunidad pinaagi sa pagpakabana sa tanan aron maagak ang biktima sa drugas balik sa katilingban. 

Kauban sa DOH ang Philippine Drug Enforcement Agency, Philippine National Police, Department of Interior and Local Government, Department of Education, Trade and Industry, Technical Educations Skills Development Authority, Defense, Agriculture, Phil Information Agency, Public Attorneys Office, National Bureau of Investigation, Armed Forces of the Philippines ug uban pang ahensya nga may kalambigitan sa suliran. 

Ang Rehabinasyon, usa na ka lapad nga programa nga mag-agak sa us aka drug user pinaagi sa pag-abag kaniya sa daghang mga programa nga gipatuman sa mga sakop nga ahensya sa ICAD aron massayun ra kini nga makalingkawas sa guyod sa drugas.

Ang ICAD, modangat usab sa Tagbilaran sa dili madugay. (rahc/PIA-7/Bohol)