Thursday, March 15, 2018

Saulog 2018 Dragonboat Challenge
Bukas pa sa Inter-brgy, interschool, 
open category, taman sa Marso 19 

TAGBILARAN CITY, March 13 (PIA)—Bukas pa ang entries alang sa 5th DragonBoat Tagbilaran City Interbarangay, Inter-school ug Club Crew Challenge nga mahitabo sa sunod Sabado, Marso 24. 

Kini maoy gipadayag ni Dominic Butalid, coordinator alang sa usa sa mga paukyab nga kalihukan samtang nagpaabut sa nagsingabut nga Saulog sa Tagbilaran. 

Ang ika 5 nga Dragonboat challenge alang sa mga kategorya nga buksan, adto himoon sa K of C promenade, Poblacion 2, sa Marso 24 sugod sa alas 7:00 sa buntag. 

Gisulti ni Butalid nga sa 19 pa ang ilang gitagal nga mopasa sa mga entries ang mga buot mosalmot, apan, sayo pa, unom na ka teams gikan sa mga distrito sa Tagbilaran ang mipadayag sa ilang kasibut sa pag-apil sa lumba. 

Ang matag team, nagkinahanglan sa labing menos 16 ka kawo: 10 niini ang moapil sa bugsay, 3 ang reserba kon ugaling adunay may tigbugsay nga may kabilinggan, 1 ka team manager, 1 ka steersman ug 1 ka ka drummer. 

Dugang sa city dragonboat race coordinator nga mahimong sagol sagol ang babaye ug lalaki sa usa ka team sa barangay, kana kon ang tuyo aron makompleto ang line-up sa tigbugsay. 

Gibutyag usab ni Butalid, kinsa sakop sa Bohol Paddlers Association Incorporated ug maoy teknikal komite sa kalihukan, nga ilang gisagop karon ang 50% nga lalaki ug 50% nga babaye sa usa ka baroto. 

Gawas sa inter barangay Dragonboat Challenge, aduna usab gibuksan nga lumba sa dragonboat alang sa mga ekwelahan sa Tagbilaran nga makahimo og team sa mga paddlers, dugang ni Butalid. 

Apan ang gipaabut sa tanan, ang mga dragonboat club crew challenge nga gipaabut nga apilan sa mga banggiitan nga crew clubs sa nasud. 

Dugang niya, kadtong mga teams nga buot mo-apil ug wala pag gamit, mahimo nilang pahulamon aron maka-ensayo, ug mas malingaw ang tanan. 

Ug agi og pagsuporta sa local nga mga mangmugnaay, ang Saulog Dragonboat Challenge mogamit sa mga dragonboat nga hinimo lamang sa Bol-anong katakus. 

Ang ginama sa mga Bol-anon nga mga dragonboat giila na karon nga maayong klase sa baroto ug mao nay kasagarang gipangita sa mga dragonboat crew clubs sa Kabisay-an. 

Ang ikalima nga Tagbilaran City DragonBoat Challenge gipasiugdahan karon sa City Government ug sa mga opisyales niini, ni Mayor John Geesnell Yap ug sa Bohol Paddlers Association Inc. 

Kadtong interesado nga makisayud kabahin niini, mahimong motawag sa 0918-631-4090. (rahc/PIA-7/Bohol)

No comments: