Saulog Tagbilaran 2018, gilusad dungan sa 

ika-453 nga anibersaryo sa Blood Compact 

TAGBILARAN CITY, Mar. 18 (PIA)--Gilusad niadtong Biyernes ang ‘Saulog Tagbilaran 2018’ dungan sa pagtimaan sa ika-453 nga anibersaryo sa Blood Compact tali nilang Datu Sikatuna ug Gen. Miguel Lopez de Legaspi. 

Gibuksan ang maong kalihokan sa usa ka Santos nga Misa nga gipahigayon sa Tagbilaran Friendship Park sa Blood Compact Site sa Barangay Bool ning dakbayan. 

Human sa misa, gipangunahan nilang Tagbilaran City Mayor John Geesnell Yap II, Gob. Edgar Chatto, Rep. Arthur Yap, inubanan sa mga pinasidunggang dinapit nga sila Department of Tourism (DOT) 7 Regional Director Shalimar Tamano ug Tourism Infrastructure and Enterprise Zone Authority (TIEZA) Chief Officer Pocholo Paragas ang paghalad og buwak sa monumento sa Blood Compact. 

Human sa paghalad sa buwak, gisunod dayon ang pagbendisyon sa amphitheatre sa Tagbilaran Friendship Park ug ang engrandeng paglusad sa Saulog Tagbilaran 2018. 

Kini ang nagbukas sa nagkalain-laing kalihokan sa mga umaabot nga adlaw paingon sa adlaw sa kapistahan ni Senyor San Jose, ang patron sa syudad. 

Ang mga umaabot nga kalihokan nagtinughang mapakita ang kultura ug kabilin sa syudad sa Tagbilaran. Kining mga kalihokan naglakip sa mosunod: Marso 17 – Saulog Tagbilaran 2018 Sports Fest Opening Ceremony sa Barangay San Isidro Covered Court; Marso 24 – Saulog Tagbilaran Dragon Boat Competition sa K of C Promenade, Poblacion 2; Abril 1 taman sa Mayo 1 –,“Tabo sa Tagbilaran” sa Tagbilaran City Hall Grounds.; Abril 6 – Saulog Martial Arts and Fitness Festival sa BQ Mall Atrium; Abril 7 – Saulog Martial Arts and Fitness Festival sa Tagbilaran City Hall Atrium. 

Abril 20 – Mutya sa Tagbilaran 2018 Talent Competition sa Bohol Cultural Center; Abril 21 taman 29 – 

Kumbira sa Tagbilaran 2018 sa Tagbilaran City Hall Grounds; Abril 22 taman Mayo 2 – Saulog Tagbilaran Visual Arts Exhibit sa Island City Mall; Abril 22 taman 30 – 9 ka adlaw nga Novena Mass sa St. Joseph Cathedral ug matag-gabii nga ‘Saulog Entertainment’ sa Tagbilaran City Square Grounds.

Samtang sa Abril 24 – Saulog Festival 2018 King and Queen Competition sa Bohol Cultural Center; Abril 27 – Mutya sa Tagbilaran 2018 Pageant and Coronation Night; Abril 28 – Saulog ‘Amity’ Street Party; Abril 29 – Saulog Color Run sa Galleria Bay, Galleria Luisa ug St. Joseph Fluvial Procession sa Causeway Sitio Ubos; Abril 30 – San Mig Night ug DYRD Kiss FM Saulog Street Party sa J.S. Torralba duol sa Dunkin Donut; Mayo 1 – Diana ug Saulog Tagbilaran Street dancing Competition gikan Plaza Rizal paingon sa CPG Sports Complex ug Mayo 6 – Saulog Photo Exhibit ug Awarding Ceremony sa Island City Mall. (ecb/PIA7-Bohol) 

Ang engrandeng paglusad sa Saulog Tagbilaran 2018 niadtong Marso 16, 2018 gidungan sa pagbendisyon sa amphitheatre sa Tagbilaran Friendship Park ug pagtimaan sa ika-453 nga anibersaryo sa Blood Compact tali nilang Datu Sikatuna ug Gen. Miguel Lopez de Legaspi. Gitambungan kini sa mga opisyal sa dakbayan sa Tagbilaran sa pagpanguna ni Mayor John Geesnell Yap II ug Kagamhanang Probinsiyal sa Bohol sa pagpanguna ni Gob. Edgar Chatto. (ecb/PIA7-Bohol)