Usa ka semana nga mga kalihukan
pagsaulog sa ika 142 sa Antequera

TAGBILARAN CITY, March 11, 2018 (PIA)—Gibuksan ang us aka semana nga mga kalihukan nga naglangkob sa ika 142 nga kasumaran sa katukoran sa lungsod sa Antequera, Domingo, Marso 11.

Usa ka Opening Program ang opisyal nga mibukas sa mga kalihukan ug gi-highlight sa pagbalaan ug sa pagbukas sa mga display booths nga gipabarug sa mga tinugyanan sa naghiusang kabarangayan sa lungsod, didto sa plaza municipal.

Ang mga display booths, kasagaran nagpakita sa gikaintapan nga mga basket sa Antequera, butang nga naghimo sa lungsod nga ilhon sa tibuok nasud nga basket capital.

Gawas sa mga baskets sa nagkadiyang gidak-on, hugis og dagway, didto usab sa mga display booths ang mga produkto sa mga umahan sa lungsod.

Gihimo usab ang mga duwa nga paukyab sama sa pagdakop sa baktin ug mga sayaw nga gilangkob usab sa mga kalihukang gisundog sa Amazing Race.

Gawas niana, may basketball exhibition game usab nga gihimo sa covered court sa lungsod nianang pagkagabii.

Sa Lunes, himoon ang opisyal nga bangga sa palami-ay sa pagluto sa buko pie.

Inig ka Martes pohon, kadtong may mga hayopan nga nanginahanglan sa pagkunsulta sa ilang mga sakit og nutrisyon lakip na ang tukmang pamustora, mahimong moapil sa animal clinic nga himoon diha sa Plaza sa lungsod.

Sa Miyerkoles sa gabii, magkatapok ang mga Antequeranhon alang sa Talent Night sa tinuig nga pagkaplag sa Miss Antequera.

Sa Huwebes, saulogon ug handumon sa lungsod ang tibuok adlaw nga gipahat alang sa kababayen-an, ang Women’s Day.

Sa Pagkagabii, mahitabo ang Antequera Music Festival nga mas giilang Kanta Piskaya.

Sa Biyernes, agi og pagsuporta ug pagtamud sa Fire Prevention Month, ang mga gihugpong nga mga fire volunteers sa lungsod maghimo sa Fire Olympics, usa ka adlaw nga mga lumba sa mga gikinahanglang katakus sa pagbugno sa sunog.

Pagkagabii, mahitabo ang kulbahinam nga pagkaplag sa Miss Antequera, nga maglangkob sa mga candidate nga magpakita sa ilang mga katakus atul sa search night.

Sa Sabado, magsugod ang kalihukan sa usa ka Misa pasalamat sa buntag, samtang pagbukas sa adlaw, subhan ug ipabalaan ang mga nahuman na nga mga proyektong imprastraktura.

Himoon usab ang pagpataas sa bandila sundan sa hamubong programa, dayon sa kap-os paniudto, manggimok na ang tanan alang sa mabulokon nga Grand Parade uban sa streetdancing contingents nga magpatighug usab sa Ritual Competition nga adto mahitabo sa covered court.

Sa pagka Domingo, mahitabo ang gikagubtan nga Antequera Offroad Duathlon, diin magkatagbo sa mga trails sa lungsod ang mga labing hawod sa dagan ug bisekleta aron makaduyog sa kasaulogan. (rahc/PIA-7/Bohol)