Tuesday, June 19, 2018

Panglao Airport, 87% na ang kahumanan; 
gitakdang itugyan sa CAAP sa Agosto 

TAGBILARAN CITY, June 18 (PIA)--Ang P7.8-bilyong New Panglao Bohol International Airport anaa na sa 87.62 porsyentong kahumanan basi niadtong Mayo 31 nga project status sa Department of Transportation (DOTr). 

Human matapos ang tanang gikinahanglan aron may makalupad ug makatugpa na nga eroplano sa maong bag-ong airport nga gitakdang mahuman sa dili pa ang Agosto 16, 2018, itugyan kini ngadto sa Civil Aviation Authority of the Philippines (CAAP). 

Matud pa ni DOTr project manager Engr. Edgardo Mangalili, gitakdang itugyan sa DOTr ngadto sa CAAP ang mga nag-unang pasilidad sa airport sama sa passenger terminal, runway ug control tower. 

Apan gipasabot ni Mangalili ngadto sa mga sakop sa media nga gisuroy sa Kagamhanang Probinsyal sa Bohol didto sa padayon pang gitrabaho nga Panglao Bohol Airport Project (PBAP) nga depende na sa CAAP kinsa maoy magpadagan sa operasyon sa tugpahanan kon sugdan na ba usab dayon sa Agosto 16 ang pagtugpa sa unang eroplanong mogamit niini. 

Ang maong tugpahanan makapahiluna og dungan sa pito (7) ka eroplano. Makapatugpa usab kini sa usa ka Boeing 777, nga mas dagko pa sa Airbus A320 nga maoy kasamtangan karong nigamit sa Tagbilaran City Airport. 

Ang maong pasilidad adunay 2,304 ka solar panels ug tulo ka generator sets nga magamit kun may pagkapalong sa sugang dagitab. 

Ang PBAP gipundohan sa kagamhanan sa Pilipinas pinaagi sa huwam gikan sa Japan International Cooperation Agency (JICA). 

Kahinumduman nga gipadayag na sa mga tinugyanan sa Bohol nga mahuman na ang airport sa Hunyo 2018, apan gisibug kini ngadto na sa Agosto. (ecb/PIA7-Bohol)

No comments: