Certificate of ownership sa 55 fiberglass pump boats, 

gitunol ni Piñol sa mga benepisyaryo sa Loon 

TAGBILARAN CITY, July 18 (PIA)--Gitunol mismo ni Department of Agriculture (DA) Kalihim Emmanuel ‘Manny’ Piñol ang certificate of ownership alang sa 55 ka fiberglass pump boats ngadto kang Loon Municipal Fisheries and Aquatic Resource Management chair Fermin Cantones. 

Ang maong 55 ka units nga fiberglass fishing boats, uban sa mga galamitan ipanghatag sa 110 ka mangingisdang benepisyaryo gikan sa 32 ka coastal barangays sa lungsod sa Loon. 

Parte kini sa P2 milyong premyo sa kagamhanang lokal sa Loon isip usa sa mga munisipalidad nga nipa-rehistro ubos sa programang Fish Registration (FishR) sa Bureau of Fisheries and Aquatic Resources (BFAR). 

Ang mga benepisyaryo gi-ila pinaagi sa konsultasyon ug ang mga benepisyaryo mismo ang nihimo sa maong mga bangka pinaagi sa pagpa-ubos sa pagbansay-bansay gikan sa BFAR. 

Gibalik ni Piñol ang pasalig sa DA sa pagsolbad sa taas nga presyo sa mga isda pinaagi sa pagpaila-ila sa dugang isda sa kamerkadohan sa lalawigan sa Bohol ubos sa short-term, financing alang sa mga mangingisda, fish farming ug cold storage facilities. 

Usa usab sa nag-unang tinguha sa administrasyon ni Presidente Rodrigo Duterte ang pagpahunong sa ilegal nga pagpangisda o illegal fishing. 

Gisaksihan ni Piñol ang blessing ug pagtugyan sa 55 fiberglass pump boats uban nila DA-7 Regional Director Salva Diputado, BFAR 7 Regional Director Nilo Katada, Gob. Edgar Chatto, Cong. Rene Relampagos ug mga lokal nga opisyal sa lungsod sa Loon sa pagpanguna nilang Mayor Elvi Peter Relampagos ug Vice Mayor Lloyd Peter Lopez. (ecb/PIA7-Bohol) 

Gitunol mismo ni DA Kalihim Emmanuel ‘Manny’ Piñol ang certificate of ownership alang sa 55 ka fiberglass pump boats ngadto kang Loon Municipal Fisheries and Aquatic Resource Management chair Fermin Cantones. Gisaksihan kini nila DA-7 Regional Director Salva Diputado, BFAR 7 Regional Director Nilo Katada, Gob. Edgar Chatto, Cong. Rene Relampagos ug mga lokal nga opisyal sa lungsod sa Loon sa pagpanguna nilang Mayor Elvi Peter Relampagos ug Vice Mayor Lloyd Peter Lopez. (hulagway sa EdCom Bohol)