DOE mipaambit og mga sugyot sa
Pagdaginot sa bayad sa koryente
TAGBILARAN CITY, July 9
(PIA)—Subay sa ilang
katuyu-an aron kasayran ang katawhan, nagpagawas ang Department of Energy (DOE)
sa mga sugyot buhaton aron makadaginot ang mga konsumidor sa bayranan sa
koryente.
Gipasabut ni DOE Secretary Alfonso Cusi nga
usa sa mga mahimong buhatan aron hingkubsan ang gasto sa koryente mao ang
pagdumala sa mga konsumidor sa ilang panginahanglan.
Kon mogamit sa aircon panaglitan, batasana nga
kuhaan og us aka oras ang pagpa-andar, o dili na paandaron kon paingon na sa
buntag kanus-a bugnaw na ang panahon, tambag sa DOE.
Dili usab himoon nga kina-iya ang
pagbukas-sira sa refrigerator tungod kay ang pag-abli niini, magpagawas sa
bugnaw, hinungdan nga kinahanglang motrabaho na usab ang makina aron pabugnawon
ang naa sa sulod sa ref, dugang pasabut sa DOE.
Gani, kon may daut na ang sira sa
refrigerator, angay na kini nga pulihan.
Mailhan kini, kon sa pagsira sa imong
refrigerator, magpa lugpit ka og kwartang papel sa pultahan. Sa pagsira na
niini, hinaya og hulbot ang kwartang papel, kon humok kining bitareon,
nagpasabut kana nga may problema na sa selyo sa imong refrigerator og makagawas
na ang bugnaw niini.
Segun pa sa DOE, kon makagawas ang bugnaw,
buot usab ipasabut niana nga makasulod usab ang init nga hangin, hinungdan na
dili na mopahuway ang ref sa pagtrabaho, hinongdan sa dako og korente magamit.
Usa sa mga labing epektibo nga lakang mao ang
pag-aghat sa katawhan sa pagsubay sa demand-side management aron maghimo nga
mas efficient ang konsumo sa enerhiya, mas makabarato ug makit-an dayon sa
kunhod nga bayronon, matud pa ni Sec Cusi.
Kon mamahimo nga kinaiya na sa kadaghanan ang
pagseguro nga walay masayang nga koryente, mas dili na kayo sakit ang epekto
sa pag-saka-kanaug sa presyo sa lana nga
nakaapekto usab sa presyo sa koryente.
Gawa sa nahisgutan sa unahan, ang DEO Energy
Utilization Management Bureau (EUMB) may regular usab nga energy saving tips
nga gimugna sa DOE ug makit-an sa ilang DOE social media accounts nga: sa
Facebook, @doe.gov.ph, sa Twitter @doe_ph ug Instagram @DOE_PH).
Anaa usab kini sa ilang energy
efficiency website: www.wattmatters.org.ph.
Kini nga mga tips,
nagtumoing nga makatabang sa mga konsumidor sa korytente nga dumalahon permi
ang ilang konsumo. (rahc/PIA-7/Bohol)
No comments:
Post a Comment