Gira batok sa droga, mas hingosgan pa; 

pagpatuman sa TRAIN, dili ihunong ni Duterte 

TAGBILARAN CITY, July 24 (PIA)--Sa iyang ikatulong State of the Nation Address (SONA), miingon si Presidente Rodrigo Duterte nga mas hingosgan pa ang gira batok sa droga o war on drugs sa iyang administrasyon. 

Matud pa sa Presidente, dili ipadaplin ang gira batok sa ilegal nga druga sa iyang gobyerno. 

Giingong dili siya magpadala sa mga ipahigayong protesta sa mga human rights advocates nga tuyong ipahunong ang iyang drug war. 

Si Duterte nagkanayon nga ang mga pagprostesta makonsiderar nga ‘misdirected’. 

Matud pa sa Presidente nga ang tawhanong katungod ang ‘concern’ sa mga tig-protesta samtang siya, kinabuhi mismo sa mga tawo ang iyang gihuna-huna. 

Gibarogan usab ni Duterte nga magpadayon ang pagpatuman sa Tax Reform for Acceleration and Inclusion (TRAIN) law. 

Gitumbok sa Presidente nga sayop nga ipasangil sa TRAIN ang pagsaka sa mga nag-unang panaliton. 

Sa iyang SONA, miingon si Duterte nga ang TRAIN nakapaggama kini og pondo alang sa mga proyekto sa gobyerno. 

Nanghinaot ang Presidente nga iyang malagdaan sa dili pa mahuman ang tuig ang TRAIN 2. (ecb/PIA7-Bohol)