Mas bug-at nga balaod sa anti-hazing, 

gilagdaan ni Presidente Duterte 

TAGBILARAN CITY, July 12 (PIA)--Gilagdaan na ni Presidente Rodrigo Duterte ang Republic Act 11053 o Anti-Hazing Act of 2018. 

Ubos niining bag-ong balaod, bawal na ang bisan unsang matang sa hazing sa mga fraternities, sororities ug uban pang organisasyon. 

Apan bisan gitugotan ang inisasyon, kinahanglan unang mangayo og pagtugot sa mga hingtungdang otoridad sa mga eskwelahan pito ka adlaw sa dili pa ang initiation rites. 

Dili usab angay nga molapas sa tulo ka adlaw ang himuong initiation activities sa mga bag-ong miyembro sa fraternity, sorority o bisan unsang organisasyon. 

Gibug-atan usab sa bag-ong balaod ang silot sa hazing depende sa dangatan o kadaot nga ihatag niini sa biktima. 

Kun maule sa pagkamatay, rape, sodomy, mutilation o pagkaputol sa bisan unsang parte sa lawas sa biktima ang hazing, pahamtangan og silot nga reclusion perpetua o pagkabilanggo sa tibuok kinabuhi ug multang P3 milyon ang mapamatud-ang direktang nalambigit sa krimen. 

Ang mga awtoridad sa mga eskwelahan, apil ang faculty members ug lakip na usab ang mga opisyal sa barangay, munisipyo ug syudad manubag usab isip accomplice o kunsabo ug mag-atubang sa kasong administratibo ilabi na kun mapamatud-ang gitugotan nila ang hazing sa fraternity, sorority o bisan unsang organisasyon. 

Nahisulod usab dinhi ang mga nahisgotang opisyal kun mapamatud-ang may nahibaw-an sila sa mahitabong hazing apan wala sila’y gihimong aksyon aron mapugngan kini ug wala gipahibalo sa mga tinugyanan sa balaod bisan wala may peligro kanila o sa ilang pamilya. 

Pahamtangan usab sila og P1 milyong multa ug reclusion temporal o pagkabilanggo og 20 taman sa 30 ka tuig nga pagkabilanggo. (ecb/PIA7-Bohol)