P15 usbaw suholan sa Bohol,

Minimum wage P338, P333 na

TAGBILARAN CITY, July 16 (PIA)— Madugangan na usab og P15.00 ang inadlaw nga suholan sa mga mamumuo sa Bohol nga nagtrabaho sa non-agricultural sector samtang may P10.00 sa mga naa sa panguma, sugod sa Agosto 3, 2018, kini subay sa gipagawas nga kasayuran sa Regional Tripartite Wage and Productivity Board (RTWPB) sa Region 7.

Subay sa labing bag-o nga Wage Order nga gipagawas sa Department of Labor and Employment (DOLE), pun-an og P15.00 ang suholan sa trabahante sa non-agriculture sa pribado’ng sector kansang kompanya may trabahante nga sobra sa 10 ug P10 naa sa kompanyang mipatrabaho og dili masobra sa 10.

Sa mga trabahante sa agrikultura, P10 usab ang gidugang sa RTWPB, mao nga gikan sa P333 nga inadlaw nga suholan sa miaging tuig, P313 na sugod sa Agosto 3.

Ug tungod niini, gikan sa inadlaw nga suholan nga P323.00 sa Bohol sumala sa Wage Order No. 20, mahimo na nga P338.00 ang madawat sa mga trabahante nga nagtrabaho sa non-agriculture nga mga nga kompanya nga may kapin sa 10 ka trabahante.

P333.00 na usab ang inadlaw ang sweldo sa mga trabahante nga nasakop sa kompanya nga wala makaabut og 10 ang ilang trabahante.

Sa mga mamumuo usab sa sector sa panguma, gikan sa P303, may P10 nga usbaw sa inadlaw nga suholan, hinungdan nga naa na sa P313 ang adlaw karon sa trabahante sa panguma sa Bohol. 

Kini usab samtang P20.00 ug P15.00 ang gidugang sa suholan sa mga trabahante subay sa nakasabutan sa RTWPB sa Central Visayas alang sa Class A ug Class B ngadto sa Class D.

Sa Class A, nalakip sa may P20.00 nga usbaw ang mga syudad sa carcar, Cebu, danao, Lapulapu, Mandaue, Naga, Talisay, mga kalungsuran sa Compostela, Consolacion, Cordova, Lilo-an, Minglanilla, San Fernando o sa mga kalungsurang nailhan nga lakip sa Mega Cebu.    

Sa Class B, nga naglakip sa mga syudad sa Toledo, Bogo ug sa mga kalungsuran sa Sugbo gawas sa Bantayan ug Camotes, gikan sa P333 sa unang wage order, dungagan kini og P15, o ngadto na sa P348.00 sa mga daghkong kompanya ug P343 sa mga may trabahante nga dili kaabut sa napulo.

Sa mga trabahante sa Tagbilaran ug sa kinatibuk-an nga Bohol nga nasulod sa Class C, gikan sa P333, mahimo nga nga mokubra sa P338.00 kon naa nagtrabaho sa dagkong kompanya ug P333 kon menos sa 10 ang gikauban sa trabaho.

Sa mga trabahante sa Siquijor, ug mga kalungsuran sa Bantayan Island ug Camotes, gikan sa kanhi-ay nga P308, naa nga sila’y makobra nga P323 sa mga dagkong kompanya ug P318 matag adlaw.

Gidasonan usab sa Wage Order nga kini wala magsukip sa mga trabahante sa balay, mga trabahante sa personal service ug sa mga trabahante sa mga kompanya nga narehistro ug nasakop sa Barangay Micro Business Enterprises ug may gihuptan nga tukmang Certificates of Authority. (rahc/PIA-7/Bohol)