Wednesday, July 18, 2018


Pagbukas sa Sandugo Agri-Fair 2018,
gipangunahan ni DA Kalihim Piñol

TAGBILARAN CITY, July 18 (PIA)--Gipangunahan mismo ni Department of Agriculture (DA) Kalihim Emmanuel ‘Manny’ Piñol ang pagputol sa laso nga nagbukas sa Sandugo Fair 2018 nga gipahigayon sa Bohol Agricultural Promotion Center (BAPC) Grounds, Dao District, ning syudad kagahapon.

Kauban usab sa Kalihim silang Gob. Edgar Chatto, Cong. Rene Relampagos, DA-7 Regional Director Salva Diputado, Bureau of Fisheries and Aquatic Resources (BFAR) 7 Regional Director Nilo Katada ug kauban sa mga Bohol agriculture agency heads.

May 16 ka lungsod, 12 ka pribadong sektor nga grupo ug 8 ka people's organization ang nag-hikyad sa ilang mga presko ug baratong produktong pang-agrikultura sama sa mga utanon, prutas, bugas ug uban pa gikan sa alas 8 sa buntag, taman alas 5 sa hapon matag adlaw taman karong Sadabo, Hulyo 21.

Ang agri-fair karong tuig nagdala sa tema nga: “Produktong Bol-anon Palamboon, Malungtarung Pagpanguma ug Pagpangisda Padayunon: Kabatan-unan Angay Madasigon.”

Sa iyang mensahe, gibalik ug gitumbok ni Piñol ang pasalig sa DA nga himuon ang lalawigan sa Bohol isip ‘Dairy Capital’ sa Pilipinas.

Gipasalig usab niini nga bahaan ang mga merkado dinhi sa suplay sa isda ug sulbaron ang taas nga presyo sa isda dinhi sa lalawigan human gi-kompirmar niini ang iyang kabangkaagan sa taas nga presyo sa isda sa Bohol nga nakapatingala niya tungod kay ang lalawigan napalibotan man og dagat.

Nipasalig usab si Piñol sa mga mag-uuma nga maka-benepisyo sila ilabi na karon nga ang National Food Authority (NFA) ubos naman sa superbisyon sa iyang departamento.

Si Gob. Chatto sa iyang bahin nitumbok nga ang agrikultura nagpabiling dugokan sa ekonomiya sa lalawigan sa Bohol nga ni-komplemento sa turismo ug information technology. (ecb/PIA7-Bohol)
Gipangunahan ni DA Kalihim Emmanuel ‘Manny’ Piñol (tunga) ang ribbon cutting rites nga nagbukas sa Sandugo Fair 2018 sa Bohol Agricultural Promotion Center (BAPC) Grounds, Dao District, Tagbilaran City niadtong Hulyo 17 diin mapalit ang mga presko ug baratong produktong pang-agrikultura sama sa mga utanon, prutas, bugas ug uban pa gikan alas 8 sa buntag, taman alas 5 sa hapon matag adlaw taman karong Sadabo, Hulyo 21. (ecb/PIA7-Bohol)

No comments: