Wednesday, July 25, 2018

Paghatag og universal healthcare, 
giseguro ni Duterte sa iyang SONA 

TAGBILARAN CITY, July 24 (PIA)--Giseguro ni Presidente Rodrigo Duterte sa katawhan ilabi na sa mga kabos nga pamilyang Pilipino ang pagbag-o sa health care system sa nasod. 

Matud pa ni Duterte sa iyang ikatulong State of the Nation Address (SONA), panahon na aron mabag-o ang sistema nga mga kabos nga pamilya ang nahikawan og katungod nga makapatambal. 

Giingong kini ang hinungdan mao nga gimugna nila ang paghimo og unified implementation sa “no balance billing policy”. 

Samtang nanawagan si Duterte sa Kongreso nga paspasan ang pagpalabang sa Universal Health Care Bill. 

“To this end, I urge the speedy passage of the Universal Health Care Bill authored by Former Representative Harry Roque. Strong political determination, not political ambition, is the guiding light,” matud pa ni Duterte. 

Kahinumdoman nga gitatakan ning bag-o lang nga ‘urgent bill’ sa Presidente ang balaodnong paghatag og universal healthcare sa mga Pilipino aron masiguro ang paspas nga pagpalabang niini sa Kongreso. 

Sa proposisyon sa Kamara, ang matag Pilipino adunay katungod nga makapahimos sa National Health Security Program, apil ang inpatient, outpatient, ug emergency care services nga naglangkob sa preventive, promotive, curative, rehabilitative, ug palliative medical, dental, ug mental health services. 

Tuyo sa maong balaodnon nga e-reconstitute ang PhilHealth ug himuong Philippine Health Security Corporation (PHSC) samtang ang National Health Insurance Fund alisdan og pangalan ug himuong National Health Security Fund. (ecb/PIA7-Bohol)

No comments: