PPOC Bohol nangayo og mas

Daghan’g sakop sa kapulisan

TAGBILARAN CITY, July 17 (PIA)—Sa nagkadaghan nga mga turista sa Bohol human temporaryo na nga pagpasira sa Boracay, buot na sa Provincial Peace and Order Council nga hangyoon ang kagamhanan nga padaghanon pa ang mga kapolisan dinhi.

Usa  ka resolusyon karon ang giduso sa PPOC ngadto sa Regional Office sa Philippine National Police niadtong katapusang tigum sa konseho alang sa hangyo sa augmentation.

Matud ni Administrator Alfonso Damalerio III, sa 1500 ka sakop sa kapolisan dinhi sa Bohol, 28 lamang niini ang tourist police.

Sa kasamtangan nga panginahanglan, mas maayo nga moabut nasa 90 ka kapolisan ang magpuli-puli og duty isip tourist police samtang madestino sa mga natumbok nga tourism destinations diin may daghang turista ang namatikdan nga mosuroy, bungat ni Damalerio.

Gawas pa sa tourist police, gilakbitan usab sa PPOC ang hangyo ngadto sa PNP nga dugangan pa usab ang mga kapolisan nga nadestino isip sakop sa Maritime Police service.

Ang Bohol, adunay 30 ka kalungsuran nga nag-ambit sa kadagatan libot sa tibuok lalawigan.

Ang maritime police, maoy natahasan nga magpatrolya abag sa uban nga mga natahasan nga ahensya aron ikapatuman ang mga balaod sa kadagatan ug  ang seguridad niini.

Subay pa usab niini, makuhaan pa usab ang mga kapolisan nga may aktibo nga duty sa mga estasyonan tungod kay may mga sakop niini nga naa sa study leave, segun pa sa tinubdan sa Kampo Dagohoy.

Dugang pa, ang kamugnaan sa Special Weapons And Tactics (SWAT) sa kapolisan, naka-apekto usab sa presensya sa kapolisan sa kadalanan sanglit ang mga sakop sa SWAT, may kaugalingon usab nga mga misyon, segun sa Kampo Dagohoy.

Apan bisan pa kon aksyonan sa PNP ang hangyo sa Bohol PPOC, gisubay na usab niini ang lain pang agi-anan aron mapahiluna ang seguridad sa Bohol.

Gitutokan na usab karon ang pag-organisa sa mga security guards ug kadtong naghimo og mga security duty ilabi na sa mga hotel, resort ug inns nga gisuroyan ug gihimong pahuwayanan sa mga turista, agi og dugang force multipliers.

Segun sa mga datus sa Department of Tourism, kon magsugod na sa pagpa-operate ang bag-o ug mas dako nga Panglao Airport, sa 2020, mokapin na sa 3 milyones ang turista nga makasuroy sa Bohol.

Kini, kaduha pilopilo-on kon itandi sa katawhan nga nanimuyo sa Bohol.

Sisp us aka tourism destination usab, paningkamotan sa Bohol nga dili hingsudlan sa mga terorista nga maoy mogun-ob sa giouy-an nga damgo sa mga Bol-anon ilabi na kabahin sa pagpanginabuhi ginamit ang turismo.

Dinhi, importante ang mas daghan nga kapolisan ang magbantay sa Bohol ug sa iyang molupyo, segun pa sa PPOC. (rahc/PIA-7/Bohol)   

HULAGWAY: Gipasabut ni provincial Administrator Alfonso Damalerio ang panginahanglan sa dugang kapolisan sa nagkadaghan nga turista nga mosuroy dinhi sa Bohol. Gipangunahan ni Damalerio and Resolusyon nga naghangyo sa kapolisan sa pagdunang og tawo dinhi. (rahc/PIA-7/Bohol)