Wednesday, July 11, 2018


RDC ngadto sa DPWH: ipatuman
ang P4.4 B Tagb-Panglao bridge

TAGBILARAN CITY, Bohol, July 10 (PIA)—Kon matuman segun sa gitagana nga panahon, sugyot sa Regional Development Council (RDC) sa Central Visayas ngadto sa Department of Public Works and Highways (DPWH), ipatuman na ang P4.4 bilyones nga 2.6 kilometros nga tulay nga magdugtong sa Tagbilaran City ngadto sa Panglao island ning tuiga.

Ang ika tulo nga connector bridge, gilantaw nga makapapaspas sa kulgot nga trapik sa panahon nga mag-operate na ang Panglao Airport sa Agusto pohon.

Una na nga gi-aprobahan sa RDC ang paglakip sa bag-ong tulay sa Tagbilaran City-Panglao island sa RD Investment Plan pinaagi sa RDC Res No 20, human kini ma-duso ngadto sa National Economic Development Authority’s Investment Coordination Committee (NEDA ICC) pinaagi sa RDC Res # 20 ug ma endorse ngadto sa DPWH aron kapundohan ug ikapatuman pinaagi sa RDC Res No 22 series of 2018.

Kahinumduman nga niadto pang 2015, kanus-a ang Bohol Provincial Development Council (PDC) mi-endorso sa proyekto ngadto sa RDC ug sa DPWH aron kahimo-an og feasibility project ang pagtukod sa bag-ong tulay.  

Una na nga nakit-an sa mga opisyales sa Bohol ang panginahanglan nga ugmaron ang agi-anan sa mga panakyanan tali sa Tagbilaran ug Panglao ilabi na sa gipaglantawan nga pagbaga sa suliran sa trapik kon makasugod sa pag-operate sa Panglao Airport.

Niadtong milabay nga Pebreo 7, 2018, giduso na sa DPWH 7 ngadto sa RDC Secretariat ang kopya sa feasibility study ug Advanced Engineering Designs sa gisugyot nga bag-ong tulay, matud sa RDC.

Sa feasibility study sa DPWH, gitun-an ang tulo ka pilianan subay usab sa kadul-on niini sa duha ka tulay nga kasamtangan nga naa na karon, ang pagbaton unya sa right of way, ang bili sa pagtukod ug  ang epekto niini sa kalikopan.

Gikan niadto, gipilian kini sa Provincial Government basa na usab sa Bohol Tourism Master Plan ug Spatial Development Framework, dugang sa RDC.

Ang napili-an mao kadtong adunay feature nga roundabout aron ipasayon ang pagpasulod sa mga sakyanan, may gitas-on nga 2.6 kilometros ug mokabat sa P4.4 bilyones, nga ipatuman sa DPWH sa 2018 ngadto sa 2020.

Buytag sa DPWH, ang proyekto aduna na’y P500 M nga pahat sa 2018 ug lain nga P 500M nga isukip sa 2019 nga budget.

Ug tungod kay sobra na sa P2.5 bilyones, kinahanglan na kini nga aprobahan sa NEDA Board, RDC mipasabut.

Segun sa RDC kadto lamang mga proyekto nga aprobado sa NEDA Board ang mahatagan og Multi-Year Obligation Authority (MYOA) gikan sa Department of Budget and Management (DBM).

Ang MYOA magseguro nga molungtad ang gikinahanglang pagpundo sa proyekto sa mga mosunod nga katuigan.

Mituo ang RDC nga ang proyekto magtabang sa rehiyon sa pagkab-ut sa mga katuyu-an sa Regional Development Plan aron pakusgon pa ang pag-ugma sa imprastraktura sa rehiyon nga makaayo niini.

Mitug-an usab ang RDC nga walay pagsupak ang mga LGUs sa Dauis ug Tagbilaran segun sa ilang giluwatan nga mga affidavits of no complaint alang sa proyekto. (rahc/PIA-7/Bohol)
Gitaho ni RDC IDC private sector head Glenn Soco didto sa RDC nga gipangulohan ni Kenneth Cobonpue nga ang ikatulong tulay sa Tagbilaran City-Panglao, naduso na sa DPWH aron kapundohan ug ikapatuman na ang pagpabarug sugod 2018 ngadto sa 2020. (rahc/PIA-7/Bohol)

No comments: