Sakop sa SSS nga ‘na-baldado?’

Makadawat og disability benefit

TAGBILARAN CITY, July 18, 2018 (PIA)—Na baldado ba kay naaksidente sa pribado nga gitrabaho-an?

Basta napasakop na sa Social Security System (SSS) ug nakahatag na og bisan usa ka buwan nga hulogan sa wala pa ang aksidente, og nakabagat og partial o total nga pagka balda, may madawat ka na nga disability benefit. 

Subay sa pagpasabut sa World Health Organization nga mao usab ang gihimo nga sumbanan sa nasud, ang pagkabaldado, nagpasabut sa kabilinggan nga magpugon na sa usa ka trabahante sa paghimo sa gimbuhaton nga nasulod sa mga abilidad nga mahimo sa usa ka normal nga tawo. 

Human mahimo nga pugos na sa kagamhanan ang pagparehistro sa negosyo aron makakuha og business permit og business name, ang tanang trabahante sa negosyo nga girehistro obligado na usab nga ipasakop. 

Kini aron paghatag og kasegurohan sa mga trabahante sa panahon sa panginahanglan. 

Subay sa bag-o nga disability benefit nga gipasubay pa gihapon sa mga patakaran sa World Health Organization (WHO), ang bag-ong palisiya sa SSS, nag-ingon nga ang sakop nga nakabutang nag bali og 36 ka binuwan nga hulogan, kon makahibalag og aksidente nga miresulta sa partial o total nga pagkabalda, ma-abagan na pinaagi sa disability benefit nga lakip sa pagkasakop sa SSS. 

Sa mga na-aksidente ug nabaldado unya nakabutang na sa 36 ka binuwan nga hulogan, o tulo ka tuig nga butangan, mahimong makadawat sa disability benefit sa SSS sa binuwan nga pension. 

Kon ugaling mabalda, unya total na ug dili na makatrabaho og balik, apan kubos pa sa 36 ka binuwan nga hulogan ang nahatag, mahimo nga kobrahon ang iyang benepisyo sa SSS sa kinas-a nga hatag o lump sum nga paagi. 

Segun pa usab sa SSS, ang binuwan nga disability pension magdepende sa tuig nga napasakop sa serbisyo. Kini mahimong may madawat nga P1,000 o 2,400 ug usahay may pakapin pang binuwan nga allowance, segun pa sa SSS. 

Tumong sa SSS nga pamaayohon pa ang serbisyo niini nga dili na magpanghadlok sa paghatag og tukmang hinabang nagdto sa mga sakop nga nag-atiman sa ilang binuwan nga hulogan poagseguro sa ilang kaugma-on. 

Alang sa tukmang kasayuran kabahin sa benepisyo, bisitaha ang labing duol nga buhatan sa SSS, nga dinhi sa Tagbilaran, makit-an sa ikatulo nga andana sa Galeria Luisa, Dakbayan sa Tagbilaran. (rahc/PIA-7/Bohol)

BENEPISYO ALANG SA MGA BALDADO. Gipahinumdom sa SSS ngadto sa ilang mga sakop nga may benepisyo nga makuha ilabi na kong nakahatag nag 36 ka binuwan nga hulogan. (rahc/PIA-7/Bohol)